दुई भारतीय टेलिकम कम्पनी गाभ्न केन्द्रको स्वीकृति

६ कार्तिक, एजेन्सी । भारतको केन्द्र सरकारले दुई भारतीय टेलिकम कम्पनीलाई एकापसमा गाभ्न ‘मर्ज’ स्वीकृति दिएको छ ।

केन्द्र सरकारको मन्त्रिपरिषदले बुधबार महानगर टेलिफोन निगम लिमिटेड एमटीएनएललाई भारत संचार निगम लिमिटेड बिएसएनएलमा गाभ्न स्वीकृति दिएको भारतीय सञ्चार तथा प्रशारण मन्त्री रवीशंकर प्रसादले बताए ।

उनले महानगरीय टेलिफोन सार्वजनिक कम्पनी भएको र यसको शेयर स्टक कम्पनीमा सूचीकृत भएकाले मर्जका लागि केही समय लाग्ने स्पष्ट गरे । मर्जरको सम्पूर्ण प्रक्रिया पूरा नहुँदासम्म एमटिएनएललाई बिएसएनएलकै सहायक कम्पनीका रुपमा राखिने छ ।

मन्त्री प्रसादले दुबै कम्पनीलाई निजीकरण गर्ने वा बिक्री गर्ने भारत सरकारको योजना नरहेको बताए । उनले दुई वर्षभित्र बिएसएनएल नाफामूलक कम्पनीमा रुपान्तरण हुने विश्वास केन्द्र सरकारले लिएको पनि जानकारी दिए ।

सार्वजनिक संस्थाका रुपमा सञ्चालित धेरै भारतीय उद्योग र व्यवसायले आर्थिक संकटको सामना गर्नुका साथै नयाँ योजना, कार्यक्रम र व्यावसायिक योजना नहुँदा निरन्तर संकटग्रस्त रहेको भन्दै आलोचना भएपछि सरकारले पछिल्लो कदम उठाएको हो ।