प्रम ओलीको दोस्रो डायलोसिस पूरा, नारायणकाजी र भीम रावलले भेट पाएनन् !

१४ कात्तिक,काठमाडौं । अकस्मात बिरामी भएपछि ग्राण्डी अन्तर्राष्ट्रिय अस्पताल धापासीमा हिजो दिउँसो भर्ना भएका प्रधानमन्त्री केपी शर्मा ओली आज बेलुकीसम्म डिस्चार्ज हुने संभावना रहेकोे छ ।

भाईटीकाको बेलुकीदेखि नै टाउको दुखेर हन्हनी ज्वरो आएपछि प्रधानमन्त्री ओली हिजो बिहान परीक्षणका लागि ग्राण्डी अस्पताल पुगेका थिए । अस्पताल पुगेपछि स्वास्थ परीक्षण गर्दा मृगौलामा विकार बढेको देखिएको थियो । रगत सफा गर्न तत्काल डाइलोसिस गर्नुपर्ने भन्ने चिकित्सकको सल्लाह बमोजिम हिजै राती एकचरण डाइलोसिस गरियो ।

दोस्रो चरणको डाइलोसिस पनि गर्नुपर्ने चिकित्सकले भनेपछि आज दिउँसो दोस्रो चरणको डाइलोसिस गरिएको प्रधानमन्त्रीका प्रेस सल्लाहकार डा. कुन्दन अर्यालले बताए । आज बिहान प्रधानमन्त्रीसँग भेट गरेका अर्यालले प्रधानमन्त्री हँसिलो मुद्रामा रहेको जानकारी दिए । भोलिबाटै काममा फर्कने पनि भेटका बेला ओलीले बताएको पनि अर्यालले जानकारी दिए । संभवत : आजै बेलुकी उहाँ बालुवाटार फर्कनु हुने छ – प्रेस सल्लाहकार अर्यालले भने ।

यसैबीच अस्पतालमा उपचारार्थ भर्ना भएका प्रधानमन्त्री ओलीलाई भेट्न गएका नेकपा नेताद्वय नारायणकाजी श्रेष्ठ र भीमबहादुर रावल रित्तै फर्किएका छन् । उपचाररत प्रधानमन्त्री ओलीलाई भेट्न यी दुवै नेता आज अपरान्ह ग्राण्डी अस्पताल पुगेका थिए । तर प्रधानमन्त्रीको डायलोसिस भईरहको भन्दै नेताद्वयलाई भेट गर्न दिइएन ।