जिल्ला अदालतमा महराको बयान हुँदै

१५ कार्तिक, काठमाडौं । पूर्वसभामुख कृष्णबहादुर महराको बहुचर्चित जवर्जस्ती करणी उद्योग मुद्धामा बयान सुरु भएको छ । जिल्ला अदालत काठमाडौंका न्यायधीश सुदर्शनराज पाण्डेको इजलाशमा जारी बयान सकिएपछि भ्याएसम्म आजै थुनछेक बहस शूरू हुने छ । नत्र आइतबार मात्र थुनछेक बहस शुरू हुने र त्यसपछि मात्र महराको हिरासत बसाईबारे टुंगो लाग्नेछ ।

संसद् सचिवालयकी कर्मचारी रोशनी शाहीलाई जवर्जस्ती करणी गर्न खोजेको आरोपमा विगत २० दिनदेखि महरा प्रहरी  हिरासतमा छन् । दशैंको अष्ठमीका दिन उनलाई प्रहरीले बालुवाटारस्थित सभामुख निवासबाटै गिरफ्तार गरेको थियो ।

पीडित भनिएकी शाहीको जाहेरीमा उनलाई प्रहरीले पक्राउ गरेको हो । भ्याएसम्म आज थुनछेक बहस सकियो भने महराको हिरासत बसाई कति हुने भन्ने टुंगो लाग्ने छः– जिल्ला अदालत काठमाडौंका प्रवक्ता ज्ञानेन्द्र कार्कीले बताए । तर प्रतिवादीका तर्फबाट धेरै जना कानून व्यवसायीले बहस गर्ने अवस्था आयो भने आज नटुंगिन सक्छ – प्रवक्ता कार्कीले भने ।