नेकपा सचेतक चौधरी चढ्ने गाडी र प्रदेशसभा सभासद् दनुवा सवार गाडी दुर्घटनाग्रस्त

१९ कार्तिक, काठमाडौं । नेपाल कम्युनिष्ट पार्टी (नेकपा)की सचेतक शान्ता चौधरी चढ्ने गाडि दुर्घटना भएको छ । दाङमा दुर्घटना परेको सो गाडीमा चौधरी भने नभएको जनाइएको छ ।

सांसद चौधरीलाई घोराही छोडेर लमही फर्किंदै गरेको बा २ झ २८७१ नम्बरको स्कारपियो गाडी लमही–घोराही सडकखण्डअन्तर्गत कुलमोड भन्ने स्थानमा गएराति ११ बजेतिर दुर्घटना भएको हो । सो गाडी सडकबाट झण्डै एक सय मिटर तल अर्जुनखोलामा खसेको छ ।

त्यस्तै हिजो साँझ उदयपुरको चौदण्डी–७ को भुल्के भन्ने स्थानमा जीप दुर्घटना हुँदा प्रदेशसभा सदस्य सञ्जाकुमारी दनुवार र त्रियुगा नगरपालिकाका उपप्रमुख देवीकुमारी चौधरी गम्भीर घाइते भएका छन् । विराटनगरबाट गाईघाट आउने क्रममा सोमबार साँझ स १ झ ५३१ नम्वरको जीप दुर्घटना हुँदा उनीहरु घाइते भएका हुन् ।