श्रीलङ्कामा एक्कासी बढेको वायु प्रदूषणप्रति अधिकारीहरूको चासो, अनुसन्धानका लागि डब्लूएचओलाई आग्रह

२२ कार्तिक एजेन्सी । श्रीलङ्काको राज्य सञ्चालित केन्द्रीय वातावरण प्राधिकरणले विश्व स्वास्थ्य सङ्गठन (डब्लूएचओ) लाई राजधानी कोलम्बोलगायतका भागहरूमा एक्कासी तथा अनपेक्षित प्रदूषण बढ्नुको कारण पत्ता लगाउन अनुरोध गरेको छ ।

मङ्गलबारदेखि श्रीलङ्काको वातावरणमा एक्कासी अत्यधिक धुलोका कण (वायु प्रदूषण) वृद्धि भएको भन्दै बिहीबार गरिएको पत्राचारमार्फत आफूहरूले श्रीलङ्काको मौसम विज्ञान विभाग तथा डब्लूएचओलाई प्राधिकरणका उप–महानिर्देशक के एच एम आराच्चीले जानकारी गराए ।

बुधबार मध्याह्न श्रीलङ्काको वायुको गुणात्मक अवस्था (एक्यूआई) प्रदूषणको घेराभन्दा माथि अर्थात् ११२ अङ्कमा पुगेको राष्ट्रिय भवन तथा अनुसन्धान सङ्गठन (एनबीआरओ)ले देखाएपछि स्थानीय पत्रपत्रिका तथा सामाजिक सञ्जालमा यसको चर्चा चुलिएको थियो ।

एनबीआरओका वातावरण अध्ययन एकाइका वरिष्ठ वैज्ञानिक सारथ प्रेमसिरीलाई उद्धृत गर्दै स्थानीय सञ्चारमाध्यमले मुलुकका कैयौँ भागमा एक्यूआईको तह १७३ अङ्कभन्दा माथि पुगेको र मध्याह्नमा १६५ मा झरेको उल्लेख गरी समाचार सम्पे्रषण गरेका थिए ।

एक्यूआई सामान्य रहँदा उक्त घेरा ५० अङ्कभन्दा तल रहने गर्छ । नयाँ दिल्लीमा बढेको वायु प्रदूषणको प्रभाब श्रीलङ्कामा परेको हुनसक्ने भए पनि एक्कासी देखिएको प्रदूषण अनुसन्धानको विषय हुनुपर्ने र कारणहरू खोजिभइरहेका प्रेमसिरीले बताए ।