डा. केसीको मागले दबावमा परेको सरकारविरुद्ध भ्रातृसंगठन कै प्रदर्शन

२२ कार्तिक, अमरगढी । चिकित्सा शिक्षा सुधारका अभियन्ता डा. गोविन्द केसीको ७ बुँदे मागसहितको अनशनका कारण वर्तमान प्रधानमन्त्री खड्गप्रसाद ओली नेतृत्वको सरकार विस्तारै दबावमा पर्दै गएको छ । एकातिर नेपाल भारत सीमा विवादले गल्दै गएको सरकारलाई आफ्नै विद्यार्थी भ्रातृसंगठनले सडकमा आएर निकम्मा भन्दै उफ्रिरहेका बेला डा. केसीले थालेको ७ बुँदे माग सहितको अनशनले थप अफ्यारो बनाएको छ ।

डा. केसीको स्वास्थ्य अवस्था बिग्रँदै

डा. केसीको स्वास्थ्य अवस्था बिग्रँदै गएपछि उनलाई आज अस्पताल भर्ना गरिएको छ । सोमबारदेखि डडेल्धुरामा १७औँ चरणको अनशन शुरु गरेका डा केसीको स्वास्थ्यमा समस्या देखिएपछि उनलाई आज साँझ डडेल्धुरा अस्पताल भर्ना गरिएको हो । डा. केसीको रक्तचाप तलमाथि भइरहेकाले उनको सहमतिमा अस्पतालमा भर्ना गरिएको सो अस्पतालका निमित्त मेडिकल सुपरिटेन्डेन्ट डा. जीतेन्द्र कँडेलले जानकारी दिए । प्रदेशसभा सदस्य कर्णबहादुर मल्ल र स्थानीय प्रसाशनको रोहबरमा डा. केसीलाई अस्पताल भर्ना गरिएको डा. कँडेलले बताए ।

चिसोका कारण डा केसीको स्वास्थ्यमा समस्या देखिएको उनका भाइ किशोरले बताए । डा केसीले अस्पतालबाटै अनशन जारी राख्ने उनले बताए । सात बुँदे माग राखी डा केसीले कार्तिक १८ देखि अनशन थालेका हुन् ।