मन्त्रिपरिषद पुर्नगठनको तयारी, आज सचिवालय बैठक बस्दै

२५ कार्तिक, काठमाडौं । सरकार गठन भएको २० महिनापछि प्रधानमन्त्री केपी शर्मा ओलीले मन्त्रिपरिषद पुर्नगठनको गृहकार्य अगाडि बढाएका छन् ।

प्रधानमन्त्री सचिवालयका साथै मन्त्रिपरिषद हेरफेर गर्नेबारे आइतबार उनले पार्टीका अर्का अध्यक्ष पुष्पकमल दाहालसँग छलफल गरेका छन् । यही विषयमा छलफल गर्न ओलीले सोमबार पार्टी सचिवालय बैठक बोलाएका हुन् ।

प्रधानमन्त्रीको चाहनाअनुसार सचिवालयका सबै सदस्यले मंसिर १ देखि लागू हुने गरी राजीनामा दिने तय भइसकेको छ । ‘मंसिर १४ को उपचुनावअघि नै मन्त्रिपरिषद पुर्नगठन गर्ने प्रधानमन्त्री तयारी छ,’ स्रोतले भन्यो, ‘सम्भवतः उपचुनावअघि नै मन्त्रिपरिषद पुर्नगठन गर्नुहुन्छ ।

केहीबाहेक अधिकांश मन्त्रीको कार्यसम्पादन औसतभन्दा माथि नउठेपछि प्रधानमन्त्री पूरै फेरबदल गर्न खोजिएको बुझिएको छ ।’ मन्त्रीहरुको कार्यशैली चुस्त र प्रभावकारी बनाउन कार्यसम्पादन सम्झौता गरे पनि अपेक्षित परिमाण नआएकोमा प्रधानमन्त्री ओली असन्तुष्ट रहँदै आएका छन् । आजको कान्तिपुर दैनिकमा खबर प्रकाशित भएको छ ।