बंगलादेशी राष्ट्रपति हमिद काठमाडाैंमा

२६ कार्तिक, काठमाडौं । जनगणतान्त्रिक राष्ट्र बंगलादेशका राष्ट्रपति मोहमद अब्दुल हमिद नेपालको चार दिवसीय औपचारिक भ्रमणमा आइपुगेका छन् । भर्खरै मात्र राजधानीस्थित त्रिभुवन अन्तराष्ट्रिय विमानस्थलमा ओर्लिएका राष्ट्रपति हमिदलाई परराष्ट्रमन्त्री प्रदिपकुमार ज्ञवाली लगायतको उच्च पदस्थ अधिकारीले स्वागत गरेका छन् ।

५२ सदस्यीय टोलीको नेतृत्व गरी नेपाल भ्रमणमा आएका बंगाली राष्ट्रपति हमिदले आजै साँझ नेपाली समकक्षी विद्यादेवी भण्डारीसँग भेट गर्ने कार्यक्रम रहेको छ । राष्ट्रपति विद्यादेवी भण्डारीको औपचारिक निम्तोमा आएका हमिद कात्तिक २९ गतेसम्म नेपाल भ्रमणमा रहने छन् ।

बंगलादेशका राष्ट्रपतिको स्वागतार्थ राजधानीमा मुख्य सहरका सडक झकिझकाउ बनाइएका छन् । आजै बंगलादेशको टोली भक्तपुरस्थित दरबार क्षेत्रको अवलोकनका लागि जाने कार्यक्रम तय भएको परराष्ट्र मन्त्रालयले जनाएको छ ।

नेपाल भ्रमणका अवसरमा बंगाली राष्ट्रपति हमिदले नेपालका राजनीतिक दलका नेताहरुसँग पनि भेट्ने कार्यक्रम बनाएका छन् । जसमा उप राष्ट्रपति नन्दबहादुर पुन, प्रधानमन्त्री खड्गप्साद ओली, राष्ट्रिय सभाका अध्यक्ष गणेशप्रसाद तिम्सिना, प्रमुख प्रतिपक्षी दलका नेता एवं पूर्व प्रधानमन्त्री शेरबहादुर देउवा लगायत रहेको परराष्ट्रले जनाएको छ ।

भ्रमणका बेला राष्ट्रपति हमिदले नेपालका प्राग ऐतिहासिक स्थलको अवलोकन गर्ने छन् । पर्यटकीय नगरी पोखराका विभिन्न स्थानमा उनको टोलीले भ्रमण गर्ने छ । साथै स्वदेश फर्कनु अघि उनले राजधानीको पर्यटकीय स्थल चन्द्रागिरिको भ्रमण गर्ने छन् ।

भ्रमण टोलीमा राष्ट्रपति हमिदका श्रीमती, दुई छोरा, सांसद् र सरकारी पदाधिकारी रहेका छन् । बंगलादेशको राष्ट्रपति स्तरमा नेपाल भ्रमण गर्ने उनी लामो समयपछिको उच्च पदस्थ हुन् । यसअघि सन् १९८७ मा तत्कालिन राष्ट्रपति मोहमद एर्शादले नेपालको राजकीय भ्रमण गरेका थिए ।