बाबुराम नै मध्यमार्गी बनेपछि

२८ कार्तिक, काठमाडौं । सत्तारुढ संघीय समाजवादी पार्टीको वहुप्रतिक्षित वैठकमा पूर्व प्रधानमन्त्रीसमेत रहेका पार्टी अध्यक्ष डा. बाबुराम भट्टराईले मध्यमार्गी धारणा राख्दै हाललाई सरकारबाट बाहिरिने प्रस्ताव तुहाई दिएका छन् ।

संघीय समाजवादी पार्टी अब सत्ताबाट तत्काललाई नहट्ने भएको छ । केन्द्रीय सदस्य रकम चेञ्जोङले बताए । पार्टी एकीकरण गर्दा नै सरकारबाट बाहिरिनु पर्ने सर्त राख्ने डा. भट्टराई नै मध्यमार्गमा उभिएपछि सत्ता छाड्नु नपर्ने भएको छ ।

यसले राष्ट्रिय जनता पार्टीसँग तत्काल एकीकरणको ढोका समेत बन्द गरिदिएको छ । पार्टीमा डा. भट्टराई र अध्यक्ष उपेन्द्र यादवबीच यही मुद्धामा बेमेल थियो । अब यो प्रकरण तत्काललाई टरेको छ – चेम्जोङले भने । परिषद बैठकमा डा.भट्टराईले पेश गरेको राजनीतिक प्रस्तावमा सरकार सम्वद्ध पार्टीसँग वार्ता गरेर संविधान संशोधनका लागि पहल गर्ने नत्र सरकार छाड्ने उल्लेख थियो ।

तर आजको कार्यकारिणी बैठकमा डा. भट्टराईले सरकारमा सहभागिताका विषयमा गंभिरतापूर्वक समीक्षा आवश्यक रहेको पनि स्पष्ट पारेका छन् । संविधान संशोधनको ललिपप ख्वाएर राख्ने नेकपाले प्रदेश प्रमुख नियुक्त गर्दा गठबन्धनसँग एक वचन सोध्नसमेत आवश्यक नठान्नु आफैंमा बिडम्बना हो भन्दै तर अझै केही समय हेर्न सकिने बताए ।

यद्यपि वर्तमान के पी ओली सरकार जनजीवनका हरेक पक्षमा फितलो र गैर जिम्मेवार देखिएकाले धेरै आशा भने गर्न नसकिने उल्लेख गरे ।