निर्वाचन आयोगप्रति कांग्रेसको आपत्ति, आज ज्ञापनपत्र बुझाइने

२९ कार्तिक,काठमाडौं । आसन्न प्रतिनिधिसभा, प्रदेशसभा र स्थानीय निकायमा हुन लागेको उपनिर्वाचनमा सत्ताधारी पक्षबाट शक्तिको व्यापक दुरुपयोग हुँदासमेत निर्वाचन आयोग मौन छ ।

निर्वाचन आचारसंहिताको व्यापक उल्लघंन हुँदासमेत आयोग मूकदर्शक बनेपछि प्रमुख प्रतिपक्षी दल नेपाली कांग्रेसले आपत्ति जनाएको हो ।

कांग्रेस नेता डा. मिनेन्द्र रिजालले सत्ताको दुरुयोगको यो हद पार गर्दा समेत केही नबोल्ने निर्वाचन आयोगप्रति नै अविश्वास गर्नुपर्ने अवस्था आएको बताए । आज बिहान पार्टी कार्यालयमा भेला भएका सञ्चारकर्मीसँगको भेटमा डा. रिजालले आयोगको यो पक्षपातपूर्ण व्यवहारको कांग्रेसले घोर निन्दा गर्ने बताए ।

यसबारे कांग्रेसले आयोग समक्ष ज्ञापनपत्र दिने तयारी गरेको जानकारी उनले दिए । आजै अपरान्ह् ३ बजे कांग्रेस नेता रमेश लेखकको नेतृत्वमा आयोग पुगेर ज्ञापनपत्र दिइने जानकारी पनि उनले दिए । आयोगद्वारा जारी आचारसंहिताको सत्ता पक्षबाट व्यापक रुपमा उल्लघंन हुँदासमेत कुनै कारबाही नगरेर मालिकको आदेश तामेली गरेको जस्तो भएको पनि उनले गुनासो गरेका छन् ।

आचारसंहिता जारी भइसकेपछि पनि सरकारले निर्वाचन प्रभावित पार्ने धेरै निर्णय गरेको दृष्टान्त डा. रिजालले दिए । प्रदेश प्रमुखको खारेजी र नयाँ नियुक्ति आचारसंहिता जारी भइसकेपछिका घटना भएको स्मरण गर्दै उनले भने – यसै अवधिमा निर्वाचन हुन लागेका स्थानमा विकास निर्माणका काम र आश्वासन अघि बढाइएको छ ।

यसबारे आज ज्ञापनपत्र दिंदै कांग्रेसले आयोग पदाधिकारीसँग प्रश्न गर्ने पनि उनले स्पष्ट गरेका छन् । यसैबीच कांग्रेसले उपनिर्वाचन हुने जिल्लाहरुलाई लक्षित गरी उपनिर्वाचन अनुगमन तथा निर्वाचन आयोग समन्वय समिति गठन गरेको छ ।

केन्द्रीय सदस्य रमेश लेखकको संयोजकत्वमा गठित उक्त समितिले आज आयोगमा गई आफ्ना असहमति ज्ञापनपत्रमार्फत बुझाउने छ । साथै निर्वाचनमा कांग्रेसको उपस्थिति दरिलो बनाउन र अनुगमन गर्न कांग्रेसले विभिन्न स्थानमा प्रतिनिधि खटाएको छ ।

जिल्ला कार्यसमितिको माग अनुसार नेताहरु खटाइएको पार्टी केन्द्रीय प्रवक्ता विश्वप्रकाश शर्माले बताएका छन् । जस अनुसार, प्रतिनिधिसभाका लागि हुने कास्की क्षेत्र नं – २ का लागि केन्द्रीय सदस्य डा. रिजाललाई प्रतिनिधि तोकिएको छ ।

यस्तै प्रदेश सभातर्फ दाङका लागि केन्द्रीय सदस्य देबेन्द्रराज कडेल, भक्तपुरका लागि केन्द्रीय सदस्य मोहन बस्नेत र बाग्लुङका लागि केन्द्रीय सदस्य शंकर भण्डारीलाई तोकिएको प्रवक्ता शर्माले बताए ।

यस्तै स्थानीय तह अन्तर्गत हुने धरान उपमहानगरपालिकाका लागि केन्द्रीय सदस्य महेश आचार्य, महोत्तरीको पिपरा गाउँपालिकाका लागि केन्द्रीय सदस्य फरमुल्लाह मन्सुर, पाँचथरको फाल्गुनानन्द गाउँपालिकाका लागि केन्द्रीय सदस्य भीष्मराज आङदंबे र हुम्लाको खार्पुनाथ गाउँपालिकाका लागि केन्द्रीय सदस्य जीवनबहादुर शाहीलाई प्रतिनिधि तोकिएको छ ।