बंगलादेशी राष्ट्रपतिको चन्द्रागिरि र पाटन दरवार स्क्वायर भ्रमण रद्द

२९ कार्तिक,काठमाडौं । नेपालको चार दिवसीय औपचारिक राजकीय भ्रमणमा आएको बंगलादेशी राष्ट्रपति मोहमद अब्दुल हमिदको टोलीले आज बिहान राजधानीको पर्यटकीय क्षेत्रका रुपमा चर्चित चन्द्रागिरिको अवलोकन गरेका छन् ।

भ्रमण दलका २७ सदस्यसहित त्यहाँ पुगेको बंगाली टोलीलाई चन्द्रागिरि हिल्स प्रालिका अध्यक्ष चन्द्र ढकालले स्वागत गरेका थिए । सो अवसरमा चन्द्रागिरि हिल्सका अध्यक्ष ढकालले चन्द्रागिरिका बारेमा विस्तृत जानकारी दिएका थिए ।

बंगलादेशी राष्ट्रपति समेत चन्द्रागिरी भ्रमणमा जाने तय भएपनि अन्तिम अवस्थामा रद्द भएको थियो । पाटन दरवार स्क्वायरको भ्रमण गर्ने कार्यसुची समेत राष्ट्रपतिले अचानक रद्द गरेका छन् ।

नेपाल भ्रमणमा रहेको उक्त उच्च स्तरीय भ्रमण टोली आजै साँझ ढाका प्रस्थान गर्दै छ । राष्ट्रपति विद्यादेवी भण्डारीको मैत्रीपूर्ण भ्रमणमा नेपाल आएको उक्त उच्च स्तरीय भ्रमण दल हिजो पोखरा भ्रमणमा थियो ।