कालापानीमा भारतीय अतिक्रमण बिरुद्ध नेविसंघको विरोध

१ मंसिर,काठमाडौ । कालापानीमा भारतीय अतिक्रमणको विरोध गर्दै नेपाल विद्यार्थी संघले आज लैनचौरस्थित भारतीय दूतावास अगाडि र माईतीघरमा विरोध प्रदर्शन गरेको छ । प्रदर्शनीका क्रममा प्रहरीसँग झडप समेत भएको छ ।

कालो व्यानर र राष्ट्रिय झण्डा लिएर भेला भएका विद्यार्थी समूहमाथि प्रहरीले बल प्रयोग गरेको थियो । साथै प्रदर्शनीमा उत्रिएका विद्यार्थीलाई प्रहरीले पक्राउ गरेको छ ।

प्रदर्शनकारीले कालो व्यानरमा नेपालको नक्सासहित लिम्पियाधुरा बनाएर बेलुनमा राखेर उडाएका थिए । सो व्यानरमा लूक मोदी दिस इज आवर म्याप लेखिएको छ ।

उता, नेपाली भूभागमा भारतले अतिक्रमण गरेपछि गैर आवासीय नेपालीको संगठन एनआरएनले समेत विरोध गरेको छ ।भारतीय कदमको विरोध गर्न एनआरएनले विश्वभरि रहेका भारतीय दूतावासमा विरोधपत्र पेश गर्न निर्दशन जारी गरेको छ ।

एनआरएन अन्तर्गत रहेको राष्ट्रिय समन्वय परिषदमार्फत विश्वभरि रहेका आफ्नो संगठनमार्फत विरोध गर्न भनिएको हो ।एनआरएन अन्तर्गत विभिन्न ८० मुलुकमा परिषद स्थापना भएका छन् ।

एनआरएनका अध्यक्ष कुमार पन्तद्वारा जारी गरिएको विज्ञप्तिमा यस्तो आह्वान गरिएको हो ।