मृगौलाको पुन प्रत्यारोपण गर्ने ओलीको निर्णय, सचिवालय बैठक बस्दै

१ मंसिर,काठमाडौं । प्रधानमन्त्री केपी ओली आगामी केही दिनभित्रै उपचारका लागि अमेरिका प्रस्थान गर्ने तयारीमा छन् । चिकित्सकहरुसँग घनिभूत छलफलपछि उनी दोस्रो पटक मृगौला प्रत्यारोपण गर्ने निश्कर्षमा पुगेका हुन् ।

पटकपटक डाइलासिस गर्नु भन्दा मृगौलाको पुन प्रत्यारोपण नै सजिलो हुने उनका निकटस्थहरुले दिएको सल्लाह ओलीलाई राम्रो लागेको छ । अमेरिकामा पुन प्रत्यारोपणको चाँजोपाँजो मिलाउन गत साता ओलीका निजी चिकित्सक डा. दिव्यासिंह शाह अमेरिका गएकी थिइन् ।

स्रोतका अनुसार, सकेसम्म छिट्टै उनी अमेरिका जाने हतारोमा छन् । मृगौलाको पुन प्रत्यारोपण गर्न ३ देखि ५ महिना लाग्ने भएकाले उनी बाँकी काम टुंग्याउन हतारिएका छन् । सबैभन्दा पहिला मन्त्रिमण्डल पुनर्गठनको उनलाई चटारो छ ।

हुन त नयाँ मन्त्रिमण्डलको खाका दुबै अध्यक्ष बसेर लगभग तयार गरिसक्नु भएको छ – एक जना केन्द्रीय नेताले भने । साथै विभिन्न आयोग र समितिमा पनि पदपूर्ति गर्ने मनस्थितिमा ओली रहेका छन् । यी काम पूरा भए लगत्तै उनी अमेरिका जाने तयारीमा छन् ।

लामो समय विदेश बस्नु पर्ने भएकाले पार्टी र सरकारको कार्यकारी अधिकार कसलाई र कुन प्रकृयाबाट दिने भनेर छलफल गर्न आज साँझ सचिवालय बैठक डाकेका छन् । ओली निकट स्रोत भन्छ – आजको बैठकमा यही अजेण्डामा छलफल हुनेछ ।

सचिवालय बैठकले पार्टीको कार्यकारी अधिकार पुष्पकमल दाहाल ‘प्रचण्ड’लाई दिने निर्णय आजै हुने उनको दावी छ । यस्तै कार्यबाहक प्रधानमन्त्री कसलाई दिने भन्नेबारे पनि वैठकमा कुरा हुने छ । प्रधानमन्त्री ओली बामदेव गौतमलाई उपप्रधानमन्त्री बनाएर कार्यबाहक तोक्न चाहन्छन् ।

तर गौतम भने कार्यवाहक नभै पूर्ण प्रधानमन्त्री बन्न नसक्ने अवस्थामा सरकारमा जाने नजाने दोधारमा रहेका छन् । यस विषयमा समेत आजको सचिवालय बैठकमा कुरा हुने छ – स्रोतले बतायो ।

यदि गौतम सरकारमा जान इच्छुक नहुँदा चाहिं ईश्वर पोखरेललाई कार्यबाहक दिने निर्णय हुने पनि उनले स्पष्ट गरे । आज बस्ने सचिवालय बैठकले अन्य नियुक्तिका सन्दर्भमा समेत छलफल गर्ने दावी उनको थियो ।

उपचारमा ३ देखि ५ महिना लाग्ने र सोको लागि लामो समय बिदेश बस्नु पर्ने अवस्थामा प्रधानमन्त्रीले कसरी जिम्मेवारी बाँडफाँट गर्ने भन्ने विषय नै आजको छलफलको मूल अजेण्डा रहेको बताइएको छ । यति काम सम्पन्न भएपछि प्रधानमन्त्री उपचारका लागि अमेरिका जाने उनले बताए ।