नवनिर्मित प्रहरी चौकी कुमरीको कार्यालय भवन उद्‍घाटन

४ मंसिर नुवाकोट । प्रदेश ३ नम्बर प्रहरी कार्यालय हेटौंडाका प्रमुख प्रहरी नायव महानिरीक्षक शेर बहादुर बस्नेतले जिल्ला प्रहरी कार्यालय नुवाकोट मातहत प्रहरी चौकी कुमरी नुवाकोटको नवनिर्मित भवनको मंगलबार आयोजित कार्यक्रमवीच उद्‌घाटन गरेका छन् ।

उक्त अवसरमा प्रहरी नायव महानिरीक्षक बस्नेतले उक्त भवन निर्माण कार्यमा सहयोग गर्ने विभिन्न महानुभावहरुलाई प्रशंसापत्र प्रदान गर्नुका साथै नवनिर्मित भवनको निरीक्षण समेत गरेका छन् ।

राष्ट्रिय पुन: निर्माण प्राधिकरण कोषको कुल १ करोड २० लाख ६८ हजार ६ सय ५ रुपैयाँ ३७ पैसा सहयोगमा उक्त भवनको निर्माण कार्य सम्पन्न भएको जिल्ला प्रहरी कार्यालय नुवाकोटले जनाएको छ ।

कार्यक्रममा बेलकोटगढी नगरपालिकाका प्रमुख राजेन्द्र रमण खनाल, संघीय प्रहरी ईकाई कार्यालय काभ्रेका प्रमुख, स्थानीय तहका प्रमुखहरु, विभिन्न राजनीतिक दलका प्रतिनिधिहरु, विभिन्न संघ-संस्थाका प्रतिनिधिहरु, स्थानीय संचारकर्मी, विभिन्न विद्यालयका शिक्षकहरु, स्थानीय बासिन्दाहरु लगायत प्रहरी अधिकृत तथा जवानहरुको उपस्थिति रहेको थियो ।

अवैध लागूऔषध सहित पक्राउ 
कठमाडौंको चन्द्रागिरी नगरपालिका-२ नागढुङगाबाट अवैध लागूऔषध चरेश १ केजी सहित धादिङ थाक्रे गाउँपालिका-३ घर भएका ३७ वर्षीय लुक राज तामाङलाई मंगलबार दिउँसो प्रहरीले पक्राउ गरेको छ ।

महानगरीय प्रहरी प्रभाग नागढुंगाबाट खटिएको प्रहरीले नवलपरासीबाट काठमाडौंतर्फ आउँदै गरेको लु.२ ख ८४३ नम्बरको बस जाँच गर्ने क्रममा बसमा सवार तामाङलाई उक्त परिमाणको लागूऔषध सहित फेला पारी पक्राउ गरेको हो ।

चोरीमा संलग्न फरार अभियुक्त पक्राउ 
काठमाडौं महानगरपालिका-३ तिलिङ्गेटारस्थित रोयल कम्प्लेक्स सिर्जन सर्टिङ एण्ड सुटिङ टेलरिङ सेन्टरमा चोरी भएको घटनामा संलग्न रही फरार रहेका काठमाडौं महानगरपालिका-३ तिलिङ्गेटार खाँडीपाखा बस्ने बाजुरा गौमुल गाउँपालिका-२ दहकोट घर भएका २१ वर्षीय दिनेश विकलाई मंगलबार राति प्रहरीले पक्राउ गरेको छ ।

उक्त सेन्टरमा गत सोमबार चोरी भएको घटनामा संलग्न व्यक्तिहरुको खोजी गर्ने क्रममा महानगरीय प्रहरी वृत्त महाराजगंजबाट खटिएको प्रहरीले काठमाडौं महानगरपालिका-३ तिलिङ्गेटारस्थित पर्वत गुल्मी,पोखरा एण्ड दाङ गेष्ट हाउसको कोठा नम्बर ३०६ बाट उनलाई फेला पारी पक्राउ गरेको हो ।

प्रहरीले विकको साथबाट नगद २५ हजार रुपैयाँ, साउदी रियाल १ दरका १ सय २६ थान, पाईन्ट १७ थान, कोट १६ थान, विभिन्न खालको सर्ट ३६ थान, जिन्सको ज्याकेट १ थान, स्टकोट ३ थान, मोवाइल १ थान, मोवाइल प्याड १ थान, सिमकार्ड ३ थान लगायत करिब २ लाख ५० हजार रुपैयाँ मूल्य बराबरको धनमाल समेत बरामद गरेको छ ।

वेवारिसे अवस्थामा रहेको भरुवा बन्दुक र बारुद बरामद 
सिन्धुपाल्चोककाे  जुगल गाउँपालिका-३ देउरालीस्थित जंगलमा वेवारिसे अवस्थामा रहेको भरुवा बन्दुक १ थान, बन्दुकमा प्रयोग हुने बारुद १० ग्राम, ४ वटा फलामको रडको टुक्रा र एक थान झोला फेला पारी मंगलबार दिउँसो प्रहरीले बरामद गरेको छ ।

ईलाका प्रहरी कार्यालय जलविरे र प्रहरी चौकी तेम्बाथानबाट खटिएको संयुक्त प्रहरी टोलीले उक्त हातहतियार फेला पारी बरामद गरेको हो । यस सम्बन्धमा प्रहरीले थप अनुसन्धान गरिरहेको छ ।

विभिन्न धनमाल चोरी 
काठमाडौं महानगरपालिका-२६ म्हेपी डेरा गरी बस्ने दोलखा तामाकोशी गाउँपालिका-४ घर भएका कृष्ण बहादुर श्रेष्ठको कोठाबाट नगद, सुनका विभिन्न गरगहना र ल्यापटप १ थान समेत गरी करिब ३ लाख रुपैयाँ बराबरको धनमाल मंगलबार साँझ चोरी भएको छ ।

यसैगरी काठमाडौं महानगरपालिका-१३ बाफल बस्ने सुनिल सापकोटाको घरबाट करिब २ लाख ५० हजार रुपैयाँ बराबरको सुनका विभिन्न गरगहना मंगलबार दिउँसो चोरी भएको छ । साथै सोही घरमा डेरा गरी बस्ने म्याग्दी घर भएकी मिना खड्काको कोठाबाट सुनको र चाँदीका विभिन्न गरगहना समेत गरी करिब १ लाख ५७ हजार रुपैयाँ बराबरको धनमाल चोरी भएको छ ।

ललितपुर, गोदावरी नगरपालिका-१ बस्ने ईन्द्र कुमारी राईको घरबाट सुनको मंगलसुत्र २ तोला र मोवाइल १ थान समेत गरी करिब १ लाख ५९ हजार रुपैयाँ बराबरको धनमाल मंगलबार दिउँसो चोरी भएको छ । चोरीमा संलग्न फरार व्यक्तिहरुको खोजी गर्नुका साथै यस सम्बन्धमा स्थानीय प्रहरीले थप अनुसन्धान गरिरहेको छ ।

आगलागीबाट विभिन्न धनमाल जलेर नष्ट 
काठमाडौं, टोखा नगरपालिका-९ म्यादी चोक बस्ने भिम प्रसाद थापाको घरमा पार्किङ गरी राखेको ग.१६ प ९९४४ नम्बरको मोटरसाइकलमा तार सर्ट भई मंगलबार राति आगलागी भएको छ । उक्त आगलागीबाट उक्त मोटरसाइकल बा।९७ प ५८७४ नम्बरको स्कुटर र हाल अल्फावेट नखुलेको ६५९२ नम्बरको स्कुटर समेत पूर्णरुपमा जलेर नष्ट भएको छ ।

बर्दिया, बाँसगढी नगरपालिका-५ बाँसगढी बजार बस्ने पुण्य प्रसाद बजगाईको कपडा पसलमा करेन्ट सर्ट भई बुधबार बिहान आगलागी हुँदा विभिन्न कम्पनीका कपडाहरु जलेर करिब ४० लाख रुपैयाँ बराबरको धनमाल नष्ट भएको छ ।

रौतहट, पर्रोहा नगरपालिका-८ मोतिपुर बस्ने सलाम ओस्ताको घरमा मंगलबार राति आगलागी हुँदा करिब ३ लाख ३५ हजार ५ सय रुपैयाँ बराबरको धनमाल जलेर नष्ट भएको छ ।

भोजपुर, अरुण गाउँपालिका-६ सिमटार बस्ने ५५ वर्षीय धन कृष्ण राईको गोठमा बुधबार बिहान आगलागी भई छिमेकी जालमान राईको गोठमा समेत आगलागी हुँदा दुवै जनाको गोठ जलेर करिब ५ लाख ५० हजार रुपैयाँ बराबरको धनमाल नष्ट भएको छ ।  स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा स्थानीय प्रहरीले थप अनुसन्धान गरिरहेको छ ।