दुई थान पेस्तोलसहित एक जना पक्राउ

५ मंसिर सिरहा । सिरहा प्रहरीले कल्याणपुर नगरपालिका-२ चतरीघाटबाट स्वचालित पेस्तोल २ थान र खाली म्याग्जिन २ थान सहित सोही नगरपालिका-३ बस्ने २१ वर्षीय अहमद मियालाई बुधबार प्रहरीले पक्राउ गरेको छ ।

जिल्ला प्रहरी कार्यालयबाट खटिएको प्रहरीले शंका लागि जाँच गर्ने क्रममा ७ एमएम र ९ एमएम गरी २ थान स्वचालित पेस्तोल र सोही पेस्तोलमा लाग्ने म्याग्जिन २ थान सहित फेला पारी पक्राउ गरेको हो । यस सम्बन्धमा थप अनुसन्धान भइरहेको जिल्ला प्रहरी कार्यालय सिरहाले जनाएको छ ।

बर्दिया, गुलरिया नगरपालिका-४ भत्किएको पुलस्थित सडकमा भे.४ प ७२१७ नम्बरको मोटरसाइकल दुर्घटनामा परी सोही नगरपालिका-१ खैरापुर बस्ने ३५ वर्षीय राजेश यादवको बिहीबार बिहान मृत्यु भएको छ । मोटरसाइकल अनियन्त्रित भई दुर्घटना हुँदा गम्भीर घाइते भएका यादवको उपचारको लागि जिल्ला अस्पताल गुलरियातर्फ लैजाने क्रममा बाटोमै मृत्यु भएको हो ।

संखुवासभा, चिचीला गाउँपालिका-१ कुवापानीमा ग।१ त ४१६४ नम्बरको ट्याक्टर बिहीबार बिहान दुर्घटना हुँदा ट्याक्टर चालक भोटखोला गाउँपालिका-५ बस्ने २१ वर्षीय मनोज तामाङको मृत्यु भएको छ । कुवापानीस्थित सडकमा ट्याक्टर अनियन्त्रित भई सडकबाट करिब १ सय मिटर तल खसेर दुर्घटना हुँदा चालक तामाङको घटनास्थलमै मृत्यु भएको हो ।
दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।

यस्तै झापाको शिवसताक्षी नगरपालिका-७ झारबारीस्थित माईखोलामा कन्काई नगरपालिका-४ बस्ने ३३ वर्षीय धन बहादुर भुजेल बिहीबार बिहान मृत अवस्थामा फेला परेका छन् ।