हिमाली क्षेत्र लापामा नयाँ प्रहरी चौकी स्थापना

६ मंसिर धादिङ । धादिङ जिल्लाको उत्तरी विकट हिमाली क्षेत्र रुवीभ्याली गाउँपालिका-५ लापामा नयाँ प्रहरी चौकी स्थापना भएको छ । नेपाल सरकार मन्त्री परिषदको गत असोज ७ गतेको निर्णयले उक्त चौकी थप निकासा भई आएको हो ।

धादिङ जिल्लाका प्रमुख जिल्ला अधिकारी अस्मान तामाङ, जिल्ला प्रहरी कार्यालय धादिङका प्रमुख प्रहरी उपरीक्षक ‍राज कुमार बैदवार र रुवीभ्याली गाउँपालिकाका प्रमुख चेरोङ तामाङले बिहीबार आयोजित कार्यक्रममा उक्त प्रहरी चौकीको संयुक्त रुपमा उद्‍घाटन गरेका छन् ।

भौगोलिक कठिनाइको कारण संवेदनशिल मानिएको उक्त क्षेत्रमा प्रहरी चौकी स्थापना भएबाट त्यहाँका नागरिकले सहज रुपमा प्रहरी सेवा प्राप्त गर्न सक्ने जिल्ला प्रहरी कार्यालय धादिङका प्रमुख प्रहरी उपरीक्षक ‍राज कुमार बैदवारले बताउनुभयो । सेवासँग सँगै शान्ति सुरक्षा र अपराध नियन्त्रण गरी सुरक्षित समाज निर्माणमा महत्वपूर्ण योगदान पुग्ने उनले उल्लेख गरे ।

कार्यक्रममा राष्ट्रिय अनुसन्धान विभागका उप-निर्देशक मुकुन्द मरहठा, रुवीभ्याली गाउँपालिकाका पदाधिकारीहरु, प्रहरी अधिकृतहरु, स्थानीय जनप्रतिनिधिहरु, स्थानीय बासिन्दाहरु लगायतको उपस्थिति रहेको थियो ।

अवैध लागूऔषध सहित पक्राउ 
धादिङको बेनिघाट रोराङ गाउँपालिका-४ लेडे खोलाबाट अवैध लागूऔषध गाँजा करिब २ केजी सहित सिद्धलेख गाउँपालिका-३ बस्ने दिपक नेपालीलाई बिहीबार राति प्रहरीले पक्राउ गरेको छ । प्रहरी चौकी मलेखुबाट खटिएको प्रहरीले उनलाई जाँच गर्ने क्रममा उक्त परिमाणको लागूऔषध सहित फेला पारी पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।

सवारी दुर्घटनामा परी ६ जनाको मृत्यु 

सिरहा, बारा, दाङ र नवलपरासी ‘पूर्व’ का विभिन्न स्थानमा भएका छुट्टाछुट्टै सवारी दुर्घटनामा परी ६ जनाको मृत्यु भएको छ ।  सिरहा, लहान नगरपालिका-१२ भोटिया चोकस्थित सडकमा ना.१ ज ८३७५ नम्बरको गाडीले स.४ प ६०४५ नम्बरको मोटरसाइकललाई बिहीबार दिउँसो ठक्कर दिई दुर्घटना हुँदा गम्भीर घाइते भएका उक्त गाडीका सहचालक महोत्तरी लोहरपट्टी नगरपालिका-४ खुट्टा पिपरारी बस्ने छोटु भन्ने १६ वर्षीय सरोज यादवलाई उपचारको लागि लैजाने क्रममा बाटोमै मृत्यु भएको छ ।

दुर्घटनामा घाइते भएका मोटरसाइकलमा सवार २ जनाको रामकुमार सारडा उमाप्रसाद मुरारक स्मारक अस्पताल लहानमा उपचार भइरहेको छ । गाडीका चालकलाई प्रहरीले नियन्त्रणमा लिएको छ । यस्तै बारा, जितपुर सिमरा उपमहानगरपालिका-२२ स्थित सडकमा ना.५ ख ९०५५ नम्बरको ट्रकले ना.४६ प २५०४ नम्बरको मोटरसाइकललाई बिहीबार दिउँसो ठक्कर दिँदा गम्भीर घाइते भएका मोटरसाइकलमा सवार चन्द्रपुर नगरपालिका-८ सन्तपुर बस्ने २६ वर्षीया तिर्थ कुमारी राई र उनको छोरा १ वर्षीय आहान चौधरीको घटनास्थलमै मृत्यु भएको छ ।

दुर्घटनामा घाइते भएका मोटरसाइकल चालक मृतकका श्रीमान २८ वर्षीय राकेश चौधरीको चुरेहिल अस्पताल हेटौंडामा उपचार भइरहेको छ । फरार ट्रक चालकको प्रहरीले खोजी गरिरहेको छ ।  यसैगरी बारा, जितपुर सिमरा उपमहानगरपालिका-१ पूर्व टोलस्थित सडकमा ना.४ ख ५३२० नम्बरको बसले ना.११ प ५४७८ नम्बरको मोटरसाइकललाई बिहीबार दिउँसो ठक्कर दिँदा गम्भीर घाइते भएका मोटरसाइकल चालक निजगढ नगरपालिका-१ बस्ने ६० वर्षीय आईतमान लोप्चनलाई अल्पाईन अस्पताल सिमरा हुँदै थप उपचारको लागि नारायणी उपक्षेत्रीय अस्पताल वीरगंजतर्फ लैजाने क्रममा बाटोमै मृत्यु भएको छ । फरार बस चालकको प्रहरीले खोजी गरिरहेको छ ।

दाङ, लमही नगरपालिका-६ बेलदमारस्थित सडकमा रा.१ ख १२७१ नम्बरको टिपरले रा.१ ब ४८७ नम्बरको मोटरसाइकललाई बिहीबार साँझ ठक्कर दिँदा गम्भीर घाइते भएका मोटरसाइकल चालक घोराही उपमहानगरपालिका-३ बेलुवा बस्ने ५८ वर्षीय बन्धुराम थारुको उपचारको लागि लमही अस्पताल लमहीतर्फ लैजाने क्रममा बाटोमै मृत्यु भएको छ । फरार टिपर चालकको प्रहरीले खोजी गरिरहेको छ ।

नवलपरासी९पूर्व०, त्रिबेणी गाउँपालिका-३ स्थित भित्री सडकमा लु.२ ख २४१५ नम्बरको टिपरको ठक्करबाट पैदलयात्री सोही ठाउँ बस्ने ४२ वर्षीया बिष्णु माया बस्यालको बिहीबार साँझ घटनास्थलमै मृत्यु भएको छ । फरार टिपर चालकको प्रहरीले खोजी गरिरहेको छ । दुर्घटनाका सम्बन्धमा स्थानीय प्रहरीले थप अनुसन्धान गरिरहेको छ ।

विभिन्न धनमाल चोरी 

काठमाडौंको कागेश्‍वरी मनहरा नगरपालिका-९ सगरमाथा कोलनी डेरा गरी बस्ने राधा मिश्रको कोठाबाट नगद, सुन तथा चाँदीका विभिन्न गरगहना समेत गरी करिब १ लाख ६० हजार रुपैयाँ बराबरको धनमाल बिहीबार दिउँसो चोरी भएको छ ।

यसैगरी बुढानिलकण्ठ नगरपालिका-१० पञ्च कुमारी चोक डेरा गरी बस्ने सिन्धुपाल्चोक बलेफी गाउँपालिका-४ घर भएका बिष्णु तामाङको कोठाबाट नगद तथा सुनका गरगहनाहरु समेत गरी करिब ३ लाख ५० हजार ५ सय रुपैयाँ बराबरको धनमाल बिहीबार दिउँसो चोरी भएको छ । चोरीमा संलग्न फरार व्यक्तिहरुको खोजी गर्नुका साथै यस सम्बन्धमा स्थानीय प्रहरीले थप अनुसन्धान गरिरहेको छ ।

आगलागीमा परी मृत्यु तथा विभिन्न धनमाल जलेर नष्ट 
उदयपुर, त्रियुगा नगरपालिका-१६ रातापानी बस्ने चन्द्र बहादुर राईको घरमा बिहीबार दिउँसो आगलागी हुँदा उक्त आगलागीमा परी राईको छोरा ५ वर्षीय बिष्णु बहादुर राईको मृत्यु भएको छ । साथै उक्त आगलागी छिमेकी बम बहादुर राईको घर र गोठमा समेत फैलिएर आगलागी हुँदा दुवै जनाको घर र गोठ जलेर करिब ३२ लाख रुपैयाँ बराबरको धनमाल नष्ट भएको छ ।

सप्तरी, राजविराज नगरपालिका-३ बस्ने राजेश कुमार देवको शिवम् ट्रेडिङ एण्ड विजनेश हाउस पसलभित्र बिद्युत सर्ट भई बिहीबार राति आगलागी हुँदा करिब १ लाख ५० हजार रुपैयाँ बराबरको धनमाल जलेर नष्ट भएको छ ।

बाग्लुङ, बाग्लुङ नगरपालिका-२ धौलागिरी चोक बस्ने शालिकराम पौडेलको हार्डवयर पसलमा करेन्ट सर्ट भई बिहीबार राति आगलागी हुँदा हार्डवयर पसल पूर्णरुपमा जली नष्ट भएको छ । आगलागीबाट भएको क्षतिको विवरण हाल खुल्न सकेको छैन ।

स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा स्थानीय प्रहरीले थप अनुसन्धान गरिरहेको छ ।