उद्योगमन्त्री भट्टको दौरा सुरुवालप्रति चरम घृणा

सुदूरपश्चिममा चरम जनआक्रोश, चोक चोकमा चर्चा शुरु

६ मंसिर,धनगढी । प्रधानमन्त्री केपी शर्मा ओली मन्त्रिपरिषदको सरकारमा नवनियुक्त मन्त्रीहरु दौरा सुरुवालमा देखिन्थे । तर दौरा सुरुवालको उद्गमस्थल सुदूरपश्चिम प्रदेशबाट प्रतिनिधित्व गर्ने नवनियुक्त उद्योग वाणिज्य तथा आपूर्ति मन्त्री लेखराज भट्ट भने दौरा सुरुवालमा देखिएनन् ।

उनी कसलाई खुशी राख्न दौरा सूरुवाललाई घृणा गरिरहेका छन् बुझी नसक्नु छ । आफ्नो प्रदेशमा नै उत्पत्ति भएको दौरासुरुवालप्रति आफ्नै प्रदेशबाट प्रतिनिधित्व गर्ने उद्योग, वाणिज्य तथा आपूर्ति मन्त्री भट्टले सुटवुटमा शपथग्रहण गरेपछि उनी सबैको आलोचनाको पात्र भएका हुन् ।

यो विषयको चर्चा अहिले सूदुरपश्चिमको चोक चोकमा शुरु भएको छ । विशेष गरी वर्तमान नेकपाका पूर्व एमालेहरु नाम उल्लेख नगर्ने शर्तमा उद्योगमन्त्री भट्टको दौरा सुरुवालप्रतिको चरमघृणालाई बुझी नसक्नु भएको बताउँदै आएका छन् ।

मन्त्री भट्टका यस्ता क्रियाकलापले आगामी चुनावमा सिंगो पार्टी पंक्तिलाई घाटा हुने र राष्ट्रवादी दलको छवि धुमिल गर्ने उनले बताए ।

मधेशलाई प्रतिनिधित्व गर्ने हृदयेश त्रिपाठीले कुर्ता पाइजामामा शपथ लिनु स्वभाविकै मानिए पनि सुदूरपश्चिमको गौरवशाली परम्परालाई कुठाराघात गर्दै त्यही क्षेत्रका प्रतिनिधिले दौरा सुरुवालको अपहेलना गरेकोमा सूदुरपश्चिमका सर्वसाधारणहरुले स्वभाविक रुपमा लिईरहेका छैनन् ।