नेविसंघका नेताहरूमाथि खुकुरी प्रहार

१२ मंसिर काठमाडौं । नेपाली कांग्रेसका सहमहामन्त्री प्रकाशरण महतले नेपाल विद्यार्थी संघ ‘नेविसंघ’का नेताहरूलाई खुकुरी प्रहार गर्नेलाई तत्काल कार्बाही गर्न माग गरेका छन् ।

बुधबार मीनभवन क्याम्पसमा पिकनिकको विषयमा विवादले उग्ररूप लिएर विद्यार्थीहरूबीच भएको झडपमा नेविसंघ मीनभवन क्याम्पसका इकाई अध्यक्ष सरोज तिमल्सिना लगायतका केही विद्यार्थी नेताहरुलाई घाइते भएका थिए । नेविसंघले सत्तारुढ दलको भातृसंगठन अनेरास्ववियुका केही नेताहरूले खुकुरी प्रहार गरेकाे आरोप लगाउँदै आएको छ ।

यता खुकुरी प्रहारबाट घाइते तिमल्सिनालाई भेट्न बीएनबी अस्पताल पुगेका महतले विद्यार्थीको मुकुन्डो लगाएर हतियार बोकेर क्याम्पस छिर्ने र क्याम्पसमा खुकुरी प्रहार गर्नेलाई कानुनी दायरामा ल्याउन सरकारसँग माग गरेका हुन् ।

आफ्ना विद्यार्थी नेताहरूमाथि खुकुरी प्रहार भएपछि नेविसंघका नेता दुजाङ शेर्पाको नेतृत्वमा बानेश्वरमा विरोध र्‍याली पनि भएको थियो । उक्त विरोध र्‍यालीमा प्रहरीले लाठीचार्ज गरेर नेता शेर्पालाई गिरफ्तार गरेको छ ।

महतले विद्यार्थी नेतामाथि खुकुरी प्रहार हुँदा त्यसको विरोधमा निकालिएको विरोध र्‍यालीमा प्रहरीले गरेको दमनप्रति पनि आपत्ति जनाए छन् ।