“नेपाली पोर्चुगलमा सडकमै सुत्छन्” शीर्षकमा समाचार आएपछि मानव तस्करहरूमा हङ्गामा

निर्मला तिवारी

१२ मंसिर, स्पेन । राष्ट्रिय समाचार समितिले ‘पोर्चुगलमा सडकमै सुत्छन् नेपाली’ शीर्षकमा समाचार लेखेपछि प्रवासी नेपाली समुदायमै हंगामा भएको छ ।

गैरआवासीय नेपाली संघ पोर्चुगलका अध्यक्ष तिलक गैरेले राष्ट्रिय समाचार समितिले प्रकाशित गरेको उक्त समाचारको खण्डन गरेका छन् ।

गैरआवासीय नेपाली संघ, राष्ट्रिय समन्वय परिषद पोर्चुगलको ‘लेटर हेड’मा छाप र मिति बिना नै ध्यानाकर्षण नोट जारी गर्दै गैरेले राष्ट्रिय समाचार समितिको उक्त समाचारप्रति एनआरएनए पोर्चुगलको गम्भीर ध्यानाकर्षण भएको बताएका हुन् ।

‘दुईचार जना दुव्र्यशनको शिकार भएका युवाहरु, परिवार एवं समाजको अथक प्रयासका बाबजुद सडकमा पनि भेटिने गरेको तथ्यलाई अतिरंजित गरी राससजस्तो विश्वसनीय संस्थाले हचुवा र काल्पनिक रुपमा समाचार प्रकाशन गर्नु खेदजनक कार्य भएको हाम्रो ठहर छ,’ गैरेले भनेका छन् ।

विभिन्न वाहानामा वैध वा अवैध रुपमा पोर्चुगल ल्याईएकाहरुको बारेमा सो समाचार प्रकाशन भएपछि मानव तस्करहरुमा भने हंगामा मच्चिएको छ । चर्को रकम असुलेर यूरोप भित्र्याइएका नेपालीहरुको कारुणिक अवस्थाले धेरैको मन छोएको छ भने तिनलाई यहाँसम्म ल्याउने मानवतस्करहरुको निन्द्रा हराम भएको बताईएको छ ।

अध्यक्ष गैरेले उक्त समाचारको खण्डन गरेपछि पोर्चुगलमै केन्द्रित रहेर पत्रकारिता गरिरहेका ७ जना पत्रकारले फेरि गैरेको भनाइकै खण्डन गरेका छन् ।

नेपाल पत्रकार महासंघ युरोप च्याप्टरका अध्यक्ष केजिन राईले भने पत्रकारिता राज्यको चौथो अंग भएको जनाउदै लोकतन्त्रमा प्रेसमाथिको हस्तक्षेप स्विकार्य नभएको बताए ।

एनआरएनएले पटकपटक यस्तो गल्ती गर्ने गरेको आरोप लगाउदै उनले कहिले पोर्चुगल कहिले स्पेन लगायत ठाउँमा लेख्न पाउने अधिकारलाई कुन्ठित गर्न खोजेकोमा गम्भीर ध्यानाकर्षण भएको जनाउदै कडा शब्दमा भर्सना गरेका छन् । साथै अध्यक्ष गैरेलाई यस्तो गल्ती सच्याउन चेतावनी दिएका छन् ।