नेपाली जहाजमा चिनियाँ नागरिक सुन बोक्दै

१३ मंसिर, काठमाडौं । प्रहरीले त्रिभुवन अन्तर्राष्ट्रिय विमानस्थलबाट आठ किलोग्राम सुनसहित दुईजना चिनियाँ नागरिकलाई पक्राउ गरेको छ ।

पक्राउ पर्नेहरुमा राहदानी नम्बर ईए ५८०७५९८ बाहक चेन होङयाङ (Chen Qinghuang) र राहदानी नम्बर ईएच ६५९६६३७ बाहक सेचपेन झेयाङ (Chpen Zhaoyang) रहेका छन् । नेपाल एयरलाइन्सको उडानद्वारा हङकङबाट आएका उनीहरुलाई विमानस्थलको भन्सार वाकथ्रु गेटमा जाँच गर्ने क्रममा उक्त सुन सहित फेला पारी प्रहरीले पक्राउ गरेको हो ।

त्रिभुवन विमानस्थल सुरक्षा कार्यालय र भन्सार कार्यालयले नेपाल एयरलाइन्सको उडानद्वारा हङकङबाट काठमाडौं आउँदै गरेका होङयाङ र झेयाङलाई बिहीबार राति ११ः४० बजे पक्राउ गरेको हो ।

महानगरीय प्रहरी कार्यालय रानीपोखरीका प्रमुख प्रहरी नायब महानिरीक्षक शैलश थापा क्षेत्रीले नियमित चेकजाँचका क्रममा सुनसहित चिनियाँ नागरिकलाई पक्राउ गरिएको जानकारी दिए ।

पक्राउ परेका दुबैजनालाई महानगरीय प्रहरी वृत्त गौशाला राखिएको छ । पक्राउ परेका व्यक्ति सुनको मालिक हुन् वा अरु हुन् भन्नेबारेमा अनुसन्धान भइरहेको प्रहरीले जनाएको छ । यस सम्बन्धमा प्रहरीले थप अनुसन्धान गरिरहेको छ ।