निर्वाचन परिणामले निराश नेकपा

१५ मंसिर काठमाडौं । मिनी जनमत संग्रहका रुपमा लिइएको उपनिर्वाचन परिणामले सरकार फेरबदल त गर्ने अवस्था थिएन नै, थियो त केवल जनभावनाको परीक्षण । हिजो मंसिर १४ गते विभिन्न ६३ स्थानमा भएका उपनिर्वाचन परिणाम लगभग सार्वजनिक भइसकेको छ ।

प्रतिपक्षी नेपाली कांग्रेसले भक्तपुरमा रिक्त प्रदेशसभामा विजय प्राप्त गरेपनि त्यसले तात्विक रुपमा प्रभाव पार्ने अवस्था छैन । विभिन्न जिल्लामा रिक्त वडा अध्यक्ष लगायत गाउँपालिका अध्यक्ष उपाध्यक्षको निर्वाचन परिणाम पनि विगत भन्दै खासै फरक आएन ।

सर्वाधिक चर्चाको केन्द्रमा रहेको कास्की २ को प्रतिनिधिसभा निर्वाचनमा नेकपाको अग्रता कायमै छ । अहिलेसम्मको अवस्था हेर्दा नेकपाका उमेदवार विद्या भट्टराईको जीत लगभग सुनिश्चित देखिन्छ । विगतमा रवीन्द्र अधिकारीले प्राप्त गरेको मत र अहिले विद्याले पाउने मतान्तर मात्रै अबको चासो बाँकी रहेको छ ।

अहिले टक्करको अवस्थामा रहेको धरान उपमहानगरपालिकाको निर्वाचन परिणाम भने रोमाञ्चक बन्दै छ । नेपाली कांग्रेसका उमेदवार तिलक राई र नेकपाका उमेदवार प्रकाश राईबीचको टक्कर गज्जबको देखिएको छ । दुबै उमेदवार बीचको मतान्तर केवल सयको अन्तरमा रहेको छ । त्यसैले यहाँ कसले विजय माला पहिरिने हो त्यसै भन्न कठिन छ ।

नेपाली कांग्रेसका उमेदवार तिलक राई जनस्तरमै भिजेका नेता हुन् । नेकपाको मत काँग्रेस भन्दा झण्डै दोब्बर रहेको विगत अहिले गलत साबित भएको छ । परिणाम कस्को पक्षमा आउने हो भनेर अनुमान लगाउन मुश्किल छ । धरान उपमहानगरपालिकामा नेपाली कांग्रेसले हार्नु परेपनि सम्मानजनक मत पाउने अवस्था नेकपाका लागि ठूलै पराजय हो ।

त्यस अर्थमा हेर्ने हो भने कांग्रेसले यसपालाको उपनिर्वाचनमा राम्रै सफलता पाएको मान्नुपर्ने हुन्छ । सत्तारुढ नेकपाले अहिले सम्पन्न उपनिर्वाचनमा प्राप्त गरेको सिट जनताको मत भन्दा अन्य प्रकरण र कारण मुख्य रहेको मान्न सकिन्छ । सत्ता संयन्त्रको यति धेरै दुरुपयोग गर्दा समेत विगत भन्दा कमजोर नतिजाले नेकपालाई ठूलै झड्का लागेको छ । खासगरी चितवनको नतिजाले नेकपा नेताको सातो गएको छ ।

भरतपुर नगरपालिका अन्तर्गत भएका तीन वटा वडा निर्वाचन परिणाम नेपाली कांग्रेसको पक्षमा आउँदा त्यही क्षेत्रबाट प्रतिनिधित्व गर्ने पुष्पकमल दाहाल प्रचण्डको ओठमुख सुक्ने अवस्था निर्माण भएको छ । छोरी रेणु दाहाललाई मेयरमा निर्वाचित गराउँदा नेपाली कांग्रेसले गरेको सहयोगको एक झल्को यसपालीको वडा अध्यक्ष निर्वाचन परिणामले ताजा बनाइदिएको छ ।

साथै दाङमा पूर्वसभामुख समेत रहेका कृष्णबहादुर महरा र प्रदेश ५ का मुख्यमन्त्री शंकर पोखरेलको गाउँको मत परिणाम पनि सत्तारुढ नेकपाका लागि सुखद भएन । यस्तै अन्यत्रको मत परिणामले नेकपाको नाक जोगिएको देखिएपनि सत्ताको राप र तापले खासै सन्तोष भने दिएन । तर निर्वाचन परिणामले प्रमुख प्रतिपक्षी कांग्रेसले पनि राहतको अनुभूति भने पाउन सकेको छैन ।