ग्लोबल र जनता बैंकका सबै कार्डबाट मंसिर १९ गते रातिसम्म काराेबार बन्द

१८ कार्तिक, काठमाडौं । जनता बैंक नेपाल लिमिटेड र ग्लोबल आइएमई बैंकले शुक्रबार (मंसिर २० गते) बाट एकीकृत कारोबार सुरु गर्ने तयारी गरेका छन् ।

ग्लोबल आइएमई बैंकको नामबाट एकीकृत कारोबार गर्ने तयारीमा रहेका यी दुई बैंकबीच मर्जरका लागि गत असार २० गते समझदारी पत्रमा हस्ताक्षर भएको थियो ।

दुवै बैंकले गएको मंसिर २ गते मर्जर प्रस्ताव पारित गरेका थिए । सम्पति तथा दायित्व मूल्यांकन प्रतिवेदनका आधारमा ग्लोबल बैंकको एककित्ता शेयर बराबर जनता बैंकको ०.८५ शेयर स्वाप रेसियो कायम भएको छ । सो निर्णयका कारण नै जनता बैंकको १०० कित्ता शेयर हुने शेयरधनीले ग्लोबल बैंकको नाममा ८५ कित्ता शेयर पाउनेछन् ।

दुवै बैंकले एकीकृत कारोबार प्रयोजनका लागि सिस्टम र डाटा माइग्रेसन गर्नुपर्ने भएका कारण मंसिर १८ गते साँझ ६ बजेदेखि १९ गते राति १२ बजेसम्म एटीएम सेवा, क्रेडिट कार्ड सेवा मोबाइल बैंकिङ, इन्टरनेट बैंकिङ तथा बीएलबीबाट प्रदान गरिने सबै सेवा बन्द रहने जनाएका छन् ।

मर्जरपछि बन्ने एकीकृत ग्लोबल आइएमई बैंकको अध्यक्षमा चन्द्रप्रसाद ढकाल र प्रमुख कार्यकारी अधिकृतमा हाल जनता बैंकका पर्शुराम कुँवर क्षेत्री रहने छन् ।