सभामुखमा फेरि नेम्बाङ नै !

२२ मंसिर, काठमाडौं । विगत तीन महिनादेखि रिक्त प्रतिनिधिसभाको सभामुखमा सत्तारुढ नेपाल कम्युनिष्ट पार्टीले नै दावेदारी गर्ने भएको छ ।

कृष्णबहादुर महराले राजीनामा दिएपछि रिक्त सभामुखमा धेरैले आँखा लगाएपनि प्रधानमन्त्री केपी ओली भने आफ्ना विश्वासपात्र समेत रहेका पूर्वसभामुख सुवासचन्द्र नेम्बाङलाई नै ल्याउने मनस्थितिमा छन् ।

अब बस्ने संसद् वैठकबाट धेरै महत्वपूर्ण काम गर्नुपर्ने भएकाले पनि ओलीको रोजाईमा नेम्बाङ परेका हुन् । यद्यपि नेम्बाङले भने विगतमा आफू सभामुखमा नदोहरिने बताउँदै आएका छन् ।

तर प्रधानमन्त्री ओलीको स्वास्थ्य निरन्तर बिग्रन थालेपछि भने नेम्बाङलाई ठूलै दवाब परेको बताइन्छ । प्रधानमन्त्री ओली अब बस्ने संसद् अधिवेशनमा संविधान संशोधन गर्ने तयारीमा रहेकाले पनि नेम्बाङ उनको रोजाईमा परेका हुन् ।

यस प्रयोजनका लागि ओलीले पार्टी अध्यक्षसमेत रहेका नेता पुष्पकमल दाहाल प्रचण्डसँग पनि कुरा गरिसकेका छन् । महराको स्थानमा नयाँ सभामुख बनाउँदा पूर्व माओवादी पक्षबाट बनाउनु पर्ने दवाव भएपनि ओलीले महत्वपूर्ण काम गर्नुपर्ने भन्दै सहमत गराएका छन् ।

स्रोतका अनुसार ओली आगामी संसद् अधिवेशनबाट संविधानमा संशोधन गरी कार्यकारी अधिकार प्राप्त राष्ट्रपतीय व्यवस्था गर्न हतारिएका छन् । त्यसैले भोलि बस्ने सचिवालय बैठकले नेम्बाङको नाममा सहमति जुटाउने प्रयास गरिने एकजना सचिवालय सदस्यले बताएका छन् ।

यद्यपि पूर्व माओवादी नेताहरु देवेन्द्र पौडेल, हरिबोल गजुरेल, पम्फा भुषाल र अग्नि सापकोटाको नाममा सहमति जुटाउन प्रचण्डमाथि ठूलै दवाब छ ।