लुटेरा समूह पक्राउ

२५ मंसिर काठमाडौं । विभिन्न सामाजिक सञ्जालको दुरुपयोग गरी करोडौं लुट्ने समूहलाई प्रहरीले पक्राउ गरेको छ ।बैंक तथा वित्तिय संस्था ह्याक गरी करोडौं रुपियाँ कुम्ल्याउने तीन जनालाई आज उपत्यका अपराध महाशाखाले सार्वजनिक गरेको छ ।

यसरी पक्राउ पर्नेहरुमा दोलखा फुलवा २ का रमेश खड्का , नवलपरासी रामग्राम १७ का विश्वेश्वर तिवारी र सोही ठाउँ बस्ने सन्दीप कलवार रहेका छन् । उनीहरुले विभिन्न सामाजिक सञ्जालको प्रयोग गरी मानिसलाई चिठ्ठा परेको भन्दै ठग्दै आएको अनुसन्धानका क्रममा पुष्टी भएको प्रहरीले बताएको छ ।

यो अपराधमा नाइजेरिया र भारतीय समूहको संलग्नता रहेको प्रहरीले जनाएको छ । अहिले पक्राउ परेकाहरु चाहिं नेपाली एजेन्ट मात्र हुन् । नेपालमा एजेन्टका रुपमा ४० जना भन्दा बढी मानिस परिचालित गरिएको पनि प्रहरीले खुलाएको छ ।प्रहरी उपरिक्षक सुशीलसिंह राठोरका अनुसार, यसरी ठग्नेहरुलाई निगरानीमा राखिएको छ ।

साथै, बैंक तथा वित्तीय संस्थाको अनलाईन ह्याक गरी करोडौं रकम लुट्ने गरेको पाइएको पनि उनले स्पष्ट गरेका छन् ।यो समूहले नेपालका एक दर्जन भन्दा बढी बैंकको खाता ह्याक गरी लुटेका छन् ।