सरकारले स्वर्ण पदक जित्ने खेलाडीलाई जनही ९ लाख रुपैयाँ दिने

२५ मंसिर काठमाडौं । सरकारले १३ औं दक्षिण एसियाली खेलकुद प्रतियोगितामा स्वर्ण पदक जित्ने खेलाडीलाई जनही ९ लाख रुपैयाँ दिने भएको छ ।

प्रधानमन्त्री निबास बालुवाटारमा बुधबार साग खेलाडीहरुको सम्मानमा आयोजित कार्यक्रममा प्रधानमन्त्री केपी ओलीले स्वर्ण विजेता खेलाडीलाई जनही ९ लाख रुपैयाँ पुरस्कार दिने घोषणा गरेका हुन् ।

त्यस्तै एक भन्दा बढी स्वर्ण जित्नेलाई जनही ११ लाख रुपैयाँ दिने पनि उहाले घोषणा गरे। टिम इभेन्टमा स्वर्ण जित्ने टोलीका हरेक सदस्यलाई जनही ५ लाख रुपैयाँ पाउनेछन् ।

स्वर्ण पदक जित्ने खेलाडीका प्रशिक्षकले पनि ५ लाख रुपैयाँ पाउनेछन् । त्यस्तै रजत जित्नेलाई ६ लाख र कांस्य जित्नेलाई ३ लाख दिने प्रधानमन्त्री ओलीले घोषणा गरे । कार्यक्रममा प्रधानमन्त्री ओलीले देशलाई माया गरेर देशका लागि खेल खेल्न आग्रह गरे ।

अव नेपालमा खेल क्षेत्रको बिकास द्रुततर ढंगले अघि बढ्ने भन्दै प्रधानमन्त्री ओलीले खेलका पूर्वाधारहरु निर्माणमा पनि सरकारले बिशेष ध्यान दिइने जिकिर गरे ।

कार्यक्रममा राष्ट्रिय खेलकुद परिषदका सदस्य सचिव रमेश सिलवालले पहिलेको तुलनामा खेल क्षेत्रको निकै बिकास भएपनि अझै पूर्वाधार निर्माणमा भने सन्तोषजनक प्रगति हासिल हुन नसकेको भन्दै सरकारको ध्यानाकर्षण गराए ।

काठमाडौंमा मंगलबार सम्पन्न सागमा नेपालले ५१ स्वर्ण, ६० रजत र ९५ कांस्यपदक प्राप्त गरेको थियो । यसअघि सरकारले स्वर्ण पदक जित्ने खेलाडीलाई ५ लाख, रजत जित्नेलाई ३ लाख र कांस्य जित्नेलाई २ लाख रुपैयाँ पुरस्कार दिँदै आएको थियो ।