आज बेलायतमा आमनिर्वाचन हुँदै

२६ मंसिर एजेन्सी । बेलायतमा बिहीबार आमचुनाव अन्तर्गत मतदान हुँदैछ । नेपाली समय अनुसार दिउँसो पौने १ बजेदेखि मतदान सुरु हुनेछ । बेलायतमा पाँच वर्ष भन्दा कम समयमा तेस्रोपटक आमनिर्वाचन हुन लागेको हो ।

बेलायतको इतिहासमा झण्डै १०० वर्ष पहिलो पटक डिसेम्बरमा चुनाव हुन लागेको हो । यसअघि सन् २०१५ र २०१७ मा पनि आमनिर्वाचन भएको थियो ।

इंग्ल्याण्ड, वेल्स, स्कटल्याण्ड र उत्तरी आयरल्याण्डका ६५० संसदीय क्षेत्रका लागि बिहीबार मतदाताले मत दिने छन् । मतदान नेपाली समय अनुसार शुक्रबार बिहान पौने चार बजे समापन हुनेछ । त्यस लगत्तै मतगणा सुरु हुने बिबिसीले उल्लेख गरेको छ । अधिकांश क्षेत्रको नतिजा शुक्रबार नै आइसक्ने छ ।

पहिलो हुने निर्वाचित हुने प्रणाली अन्तर्गत बेलायतका ६५० संसदीय क्षेत्रका प्रतिनिधिको चयन यो चुनावबाट हुनेछ । सन् २०१७ मा भएको चुनावमा सबैभन्दा पहिले न्युक्यासल सेन्ट्रल संसदीय क्षेत्रको नतिजा आएको थियो ।

बेलायतमा सामान्यतया हरेक चार या पाँच वर्षमा आमनिर्वाचन हुने गर्छ । तर गएको अक्टोबरमा सांसदहरुले आमनिर्वाचनको पक्षमा मत दिए । सन् १९७४ पछि बेलायतमा जाडो याममा हुन लागेको यो पहिलो निर्वाचन हो । त्यसअघि सन् १९२३ मा पनि डिसेम्बरमा आमनिर्वाचन भएको थियो ।

बेलायतको आमचुनावमा १८ वर्षमाथिका सबै बेलायती नागरिक तथा कमनवेल्थ वा रिपब्लिक अफ आयरल्याण्डका योग्य नागरिकहरु जसले मतदाता नामावलीमा आफ्नो नाम दर्ता गएका छन् उनीहरुले मत दिन पाउँछन् । अहिलेको चुनावका लागि नोभेम्बर २६ सम्म मतदाताको नामावली दर्ता गरिएको थियो ।