आजदेखि तीन दिनसम्म हिमपात र वर्षा

६ मंसिर काठमाडौं । पश्चिमी वायुको प्रभावले बिहीबारदेखि पानी र हिमपातको सम्भावना रहेको छ। पश्चिमका हिमाली भेगमा हिमपात र पहाडी भेगमा वर्षा हुने मौसम पूर्वानुमान महाशाखाले जनाएको छ ।

महाशाखाले तीन दिनको मौसमी बुलेटिन सार्वजनिक गर्दै बिहीबारदेखि तीन दिनसम्म हिमपात र वर्षाको सम्भावना रहेको जनाएको हो । अहिले पश्चिमका हिमाली भेगमा हिमपात र पहाडी केही ठाउँमा पानी परिरहेको मौसमविद मञ्जु बासीले जानकारी दिए । पानी र हिमपातका कारण चिसो पनि देशैभर बढेको छ ।

हिमपातको सम्भावना रहेकाले आउँदो शनिबारसम्म पदयात्रामा नजान मौसमविद् बासीले पर्यटकलाई आग्रह गरे । आउँदो शनिबारपछि भने मौसम खुल्ने उनको भनाइ छ ।

यस्तै काठमाण्डौ उपत्यकासहित देशैभर चिसो बढेको छ । काठमाडौं उपत्यकाको तापक्रम घटेसँगै चिसोका कारण बिरामी हुनेको संख्या पनि बढेको छ । चिसो बढेकाले बिहान बेलुका घर बाहिर सकेसम्म ननिस्किन डाक्टरले आग्रह गरेका छन् ।

निस्किनै परे न्यानो लुगा लगाएर हिँड्न डाक्टरको सुझाव छ । त्यस्तै झोलिलो तथा तातो खाना खानुपर्ने उनीहरुले बताएका छन् ।

बिशेष मौसम बुलेटिन (Special Weather Bulletin)

(जारी मितिः २०७६-०८-२६, बिहान ६:०० बजे)

मिति २०७६ मंसिर २५ गते बुधबार साँझ नेपालको पश्चिमी भुभागबाट न्युन चापिय प्रणालीको प्रवेश भएको छ। यस प्रणालीका कारण नेपालका पश्चिमी उच्च पहाडी र हिमाली भू-भागमा भारी हिमपात हुने सम्भावना छ। यो प्रणाली अझै सशक्त भई देशका मध्य र पूर्वका उच्च पहाडी र हिमाली भू-भागमा समेत हल्का देखि मध्यम हिमपातको सम्भावना रहेको छ।

उक्त प्रणालीका कारण देशैभरी बदली भई अधिकतम र न्युनतम तापक्रममा गिरावट आई देशैभरी चिसो बढ्ने देखिन्छ। साथै यस प्रणालीका कारण देशका पश्चिमी भू-भागका धेरै स्थानहरूमा र मध्य र पूर्वी भू-भागका केही स्थानहरूमा हल्का वर्षाको सम्भावना समेत रहेको छ। बुधबार बाट शुरू भएको यो मौसमी प्रणाली शनिबार सम्ममा अन्त्य हुने देखिन्छ।

उच्च पहाडी र हिमाली भू-भागमा भारी हिमपात हुन सक्ने र पहाडी भेगमा वर्षा हुने र साथसाथै तापक्रममा गिरावट पनि हुने सम्भावना रहेको हुनाले सतर्कता अपनाउन हुन सर्वसाधारण लगायत सबैमा अनुरोध गरिन्छ।