कांग्रेस बैठक बस्दै, भातृसंस्थामा पदाधिकारी नियूक्तिको तयारी

२६ मंसिर,काठमाडौं । प्रमुख प्रतिपक्षी दल नेपाली कांग्रेस केन्द्रीय कार्य समिति वैठक आज पार्टी मुख्यालय सानेपामा बस्दै छ । भर्खरै सम्पन्न उपनिर्वाचनको समीक्षा गर्न भनिए पनि बैठकले विभिन्न विभागको गठन गर्ने तयारी गरेको एक केन्द्रीय सदस्यले नेपालबहस डटकमलाई बताएका छन् ।

आज दिउँसो बस्ने बैठकमा सभापति शेरबहादुर देउवा , वरिष्ठ नेता रामचन्द्र गौतम र नेता कृष्णप्रसाद सिटौलाले आ आफ्नो दावेदारी प्रस्तुत गर्ने भएका छन् । वैठकबारे जानकारी दिंदै केन्द्रीय प्रवक्ता विश्वप्रकाश शर्माले मूलतः उपनिर्वाचनको समीक्षा नै गर्ने हो भनेका छन् ।

तर वैठकमा विभिन्न विभागको गठन र भातृ संस्थाको महाधिवेशबारे पनि छलफल हुने प्रवक्ता शर्माले बताए । यसका साथै नेपाल विद्यार्थी संघ र नेपाल तरुण दलमा देखिएका विवादको सर्वपक्षीय हल खोज्नेतर्फ पनि कुरा हुने उनले स्पष्ट गरेका छन् । कांग्रेसको बलियो आधारस्तम्भका रुपमा रहेका तरुण दल र नेविसंघमा लामो समयदेखि नै विवाद चुलिएको छ ।

उता, पार्टीको क्रियाशील सदस्यताबारे पनि केन्द्रीय कार्यसमिति बैठकले स्पष्ट नीति तय गर्ने जानकारी प्रवक्ता शर्माले दिएका छन् । जारी केन्द्रीय कार्यसमिति वैठकमा भातृ एवं शुभेच्छुक संस्थाको सैद्धान्तिक मापदण्ड तथा विधान सुझाव समतिले तयार पारेको विधान प्रस्तुत हुने कार्यक्रम तय गरिएको छ ।

उक्त समितिको संयोजक केन्द्रीय सदस्य एनपी साउद हुन् । हिजो साँझ बसेको पदाधिकारी वैठकले यी विषयमा छलफल गर्ने सहमति जनाएको थियो ।

कांग्रेसका १८ भातृसंस्था मध्ये अधिकांशको म्याद सकिसकेको छ । सबै तदर्थ समिति बनाएर चलिरहेका छन् । चालु बैठकले केही भातृ संस्थाको पदाधिकारी नियुक्त गर्न सक्ने प्रवक्ता शर्माले बताए । “खासगरी नेवि संघ र तरुण दलबारे नेताहरु संवेदनशील हुनुहुन्छ”- उनले भने ।