नेकपा स्थायी कमिटी बैठक शुरु

२९ मंसिर, काठमाडौं । सत्तारुढ नेपाल कम्युनिष्ट पार्टीको बहुप्रतिक्षित स्थायी कमिटी बैठक पार्टी केन्द्रीय कार्यालय धुम्बाराहीमा भर्खरै शुरु भएको छ । विगत एक वर्षदेखि बस्न नसकेको स्थायी कमिटी वैठक डाक्ने संस्थापन इतर पक्षले माग गर्दै आएको थियो ।

प्रधानमन्त्री केपी शर्मा ओली सहभागी नरहेको स्थायी कमिटी बैठकका लागि बिहानै सचिवालय बैठकले पाँच वटा अजेण्डा तयार गरिसकेको हो । सचिवालय बैठकमा भने प्रधानमन्त्री ओली सहभागी थिए । वैठकमा उनले आफ्नो स्वास्थ्य अवस्थामा उल्लेख्य सुधार भएको जानकारी दिएका थिए ।

नेकपाको विधान अनुसार प्रत्येक तीन महिनामा स्थायी कमिटीको बैठक बस्नुपर्ने हुन्छ । तर ओलीले पछिल्लो बैठक आजको ठीक एकवर्ष अघि अर्थात २०७५ मंसिर २९ मा राखेका थिए । त्यसयता ओलीले आफू अनुकुल हुने गरी सबै निर्णय सचिवालय बैठकबाटै गराउँदै आएका छन् ।

तर पार्टीका अर्का अध्यक्ष पुष्पकमल दाहाल “प्रचण्ड”लाई कार्यकारी अधिकार प्राप्त अध्यक्ष बनाएपछि भने उनको सक्रियता बढेको छ । प्रचण्डले नै स्थायी कमिटी बैठक डाँकेका हुन् ।

लामो समयको अन्तरालमा हुन लागेको यस बैठकले महत्वपूर्ण निर्णय गर्ने अनुमान गरिएको छ । खासगरी उपाध्यक्ष पदमा नेता बामदेव गौतमलाई लैजान सहज हुने गरी विधान संशोधन गर्न बैठकले बाटो खोली दिने आम अनुमान रहेको छ ।