मुशर्रफ देशद्रोही हुनै सक्दैनन् : पाकिस्तानी आर्मी

२ पुस एजेन्सी । पाकिस्तानका पूर्व राष्ट्रपति जनरल परवेज मुशर्रफलाई मंगलबार लाहौर उच्च अदालतले देशद्रोहको मुद्दामा दोषी ठहर गर्दै मृत्युदण्डको सजाय सुनाएपछि पाकिस्तानमा विचार विभाजित भएको छ ।

केहीले यसको समर्थन गरेका छन् भने केहीले अदालतको फैसलाको विरोध गरेका छन्। पाकिस्तानको सत्ता र राजनीतिमा अति महत्वपूर्ण स्थान लिँदै आएको आर्मीले अदालतको फैसलाप्रति निराशा व्यक्त गरेको छ ।

पाकिस्तानको ७२ वर्षे इतिहासमा झण्डै आधा समय सत्तामा रहेको सेनाले पूर्व राष्ट्रपति मुशर्रफलाई देशद्रोहको अभियोगमा मृत्युदण्डको फैसला हुनु दुःखद रहेको भन्दै त्यसको निन्दा गरेको छ । पाकिस्तानको इतिहासमा आर्मीका पूर्व प्रमुखमाथि देशद्रोहको अभियोगमा मृत्युदण्डाको फैसला भएको यो पहिलो पटक हो । पाकिस्तानी सेनामा पूर्व अधिकारीहरुको प्रभाव रहेको ठानिन्छ ।

पाकिस्तानी आर्मीले मुशर्रफलाई मृत्युदण्ड दिने लाहौर उच्च अदालतको फैसलाप्रति टिप्पणी गर्दै आफ्ना पूर्व प्रमुख कुनै पनि हालतमा देशद्रोही या गद्दार हुनै नक्सने बताएको छ । ७६ वर्षका मुशर्रफ सन् २०१६ यता देश बाहिर छन् । उनले अधिकांश समय लण्डन र दुबाईमा बिताउँदै आएका छन् ।

अदालतको फैसलापछि पाकिस्तानी सेनाले जारी गरेको वक्तव्यमा भनिएको छ, ‘फैसलाले सैन्य बल पीडा र दुःखमा छ ।’लाहौर उच्चअदालतका तीन न्यायाधीशको बेन्चले बहुमतका आधारमा उनलाई मृत्युदण्डको सजाय सुनाएको हो ।

इस्लामावादको विशेष अदालतले सन् २०१४ मार्च ३१ मा देशद्रोहको एक मुद्दामा पाकिस्तानका पूर्व सैनिक राष्ट्रपति जनरल परवेज मुशर्रफलाई अभियुक्त बनाएको थियो । जनरल परवेज मुशर्रफले सन् १९९९ मा सैन्य विद्रोह गरेर पाकिस्तानको सत्ता आफ्नो हातमा लिएका थिए।