आज पनि दिल्लीमा विशाल प्रदर्शन हुँदै

४ पुस एजेन्सी । नागरिकता संशोधन कानुनको विरोधमा भारतका विभिन्न स्थानमा लगातार प्रदर्शन भइरहेको छ । बिहीबार अलग–अलग संगठनका तर्फबाट देशव्यापी विरोध प्रदर्शन भयो ।

ती विरोध प्रदर्शनहरुमा अहिलेसम्म तीनजना मारिएका छन् । सयौँ प्रदर्शनकारीहरुलाई प्रहरीले पक्राउ गरेको छ । यसैबीच विरोध प्रदर्शन बढेपछि प्रशासनले राजधानी दिल्लीसहित उत्तर प्रदेश र कर्नाटकमा धारा १४४ लागु गरेको छ।

थुप्रै स्थानमा इन्टरनेट सेवा बन्द गरिएको छ । दिल्लीमा रेल्वे सेवा पनि बन्द गरिएको छ । समाचार एजेन्सी अमर उज्यालाका अनुसार कर्नाटकमा विरोध प्रदर्शनका क्रममा प्रहरीले गोली चलाएपछि दुईजनाको मृत्यु भएको छ ।

केही प्रदर्शनकारीले प्रहरीचौकीमा आगजनीको प्रयास गरेपछि गोली चलाउनु परेको प्रहरीले जनाएको छ। त्यहाँ अहिले कर्फ्यू लगाइएको छ ।

एक अर्का व्यक्तिको मृत्यु उत्तरप्रदेशको राजधानी लखनउमा भएको छ । त्यहाँ प्रदर्शनकारी र प्रहरीबीच झडपमा क्रममा एक प्रदर्शनकारीको मृत्यु भएको हो ।

यसैबिच, नागरिकता समाधानका लागि शुक्रबार पनि नयाँ दिल्लीमा दुई ठूला प्रदर्शन हुने भएका छन् । आज दिउँसो १ बजे दिल्लीको आर्मीको साइडबाट जामा मस्जिद गेट नम्बर १ देखि जंतर-मंतर सम्म र साँझ ५ बजे  अर्को पक्षका केहि संगठनहरुद्धारा राजीव कुञ्जी मेट्रो स्टेशन गेट ७ मा प्रदर्शन गर्न आह्वान गरिएको छ।