क्रिश्चियनका सर्वोच्च धर्मगुरुद्वारा मध्यरातमा क्रिसमसको शुभारम्भ

९ पुष, काठमाडौं । क्याथोलिक इसाईका सर्वोच्च धर्मगुरु पोप फ्रान्सिसले मध्यरातमा क्रिसमस पर्व शुभारम्भ गरेका छन् । भ्याटिकन सिटीस्थित सेन्ट पिटर्स बासिलिकामा क्रिसमसको पूर्वसन्ध्यामा आयोजित समारोहमा भेला भएका मानिसलाई सम्बोधन गर्दै उनले क्रिसमसको शुभारम्भ गरेका हुन् ।

यशु ख्रिष्टको जन्मदिनका अवसरमा मनाइने क्रिसमसको शुभारम्भ समारोहमा उनले भने, “हामी असल भएपनि खराब भएपनि प्रभुले हामी सवैलाई निरन्तर माया गरिरहनु हुन्छ ।” “तपाईँहरूले गलत विचार गरेको हुन सक्छ र पूरै अस्तव्यस्तता निम्त्याएको हुन सक्छ, तथापि ईश्वरले माया जारी राख्नुहुन्छ,“ उनले थपेका छन् ।

क्रिसमसको दिन पोप फ्रान्सिस सेन्ट पिटर्स बासिलिका फर्कने र त्यहाँबाट उनले क्रिसमसको शुभारम्भ गर्दै विश्वलाई सन्देश दिने परम्परा रहेको छ । विश्वभरी रहेका एक अर्ब तीस करोड क्याथोलिक क्रिश्चियन धर्माबलम्बीलाई उनले मंगलबार सम्वोधन गरेका हुन् ।

यशुको जन्मस्थल मानेर श्रद्धा गरिने बाइबलसँग सम्वन्धित स्थल बेथ्लेहेममा आयोजित सो कार्यक्रममा विश्वभरबाट क्रिश्चियन धर्मावलम्बी ठूलो सङ्ख्यामा पुगेका थिए । उनले क्रिसमसको शुभारम्भ गरेसँगै क्रिश्चियन धर्मावलम्बी रहेका ठाउँमा क्रिसमस मनाउने क्रम सुरु भएको छ । क्रिसमसका अवसरमा शुभकामना आदानप्रदान गर्ने मिठो खाने, राम्रो लगाउने, रमाइलो गर्नेलगायतका क्रियाकलाप हुने गर्दछ ।