सभापतिले पार्टी विधानको धज्जी उडाएको वरिष्ठ नेता पौडेलको आरोप

१२ पुस काठमाडौं । नेपाली कांग्रेसको असन्तुष्ट पक्षले केन्द्रीय समितिले गरेको निर्णयप्रति आपत्ति जनाएको छ । शनिबार महामन्त्री शशांक कोइराला निवास महाराजगञ्जमा बसेको वरिष्ठ नेता रामचन्द्र पौडेल समूहको बैठकले सभापति शेरबहादुर देउवाले पार्टीलाई संकटमा धकेलेको निष्कर्ष निकालेको हो ।

बहुमतका नाममा पार्टीको विधि विधान उल्लंघन गरेर निर्णय आएको भन्दै उक्त निर्णय नमान्ने उनीहरूको धारणा छ । बैठकपछि आयोजित पत्रकार सम्मेलनमा काग्रेस बरिष्ठ नेता रामचन्द्र पौडेलले शुक्रबारको निर्णयले पार्टीलाई थप धरासयी बनाएको हुँदा देशभरका कांग्रेस कार्यकर्ता सचेत हुने बेला आएकोे बताए । उनले महासमिति बैठकपछि संशोधन गरिएको पार्टी विधानको धज्जी उडाउने काम सभापति देउवाबाट भएको आरोप पनि लगाए ।

महाधिवेशनको कार्यतालिका सार्वजनिक गर्ने नाममा आफुखुशी विधानका दफा निलम्बन गरिएको उहाको भनाई छ । पौडेलले पार्टी विधानको व्यवस्था निलम्बन गर्ने कुरा बहुमतबाट हुन नसक्ने भन्दै त्यसमा सहमति नखोजिएकोमा पनि आक्रोश पोखे ।

त्यस्तै महामन्त्री शशांक कोइरालाले पार्टीभित्र एकतामा जोड दिँदै बहुमतबाट गरिएको निर्णयले पार्टीलाई कमजोर बनाउने बताए । सहमतिका लागि छलफल भइरहेकै बेला एक्कासी निर्णय भएको भन्दै कोइरालाले असन्तुष्टि व्यक्त गरे । पूर्वमहामन्त्री एवं वार्ता टोलीका संयोजक प्रकाशमान सिंहले सहमतिका पक्षमा आफुहरू हुँदाहुँदै पनि सभापति देउवा पक्षले बहुमतको दम्भ देखाएको बताए ।

शुक्रबार कांग्रेस बैठकले महाधिवेशन ०७७ फागुनमा गर्ने, विभाग बढाएर ४७ वटा बनाउने, तरूण दलको कार्यकाल ६ महिना थप गर्नेसहित विभिन्न ९ वटा निर्णय गरेको थियो । वरिष्ठ नेता पौडेल समूहले भने सो बैठक बहिष्कार गरेको थियो ।