के तपाईले घर बनाउदै हुनुहुन्छ ? यी सिमेन्ट प्रयोग गर्दा होशियार हैं !

१४ पुष, काठमाडौं । हिउँद लाग्यो । के तपाईले निजी घर, व्यापारिक मल वा विकास निमार्णका अन्य काम गर्दै हुनुहुन्छ ? यदि घर वा यस्तै यस्तै काम गर्ने तयारी गर्दै हुनुहुन्छ भने सिमेन्ट त अवश्य चाहिन्छ । तर कुन सिमेन्ट प्रयोग गर्ने दोधारमा हुनुहुन्छ भने तलको समाचार पढेर सचेत हुनुहोला है ? नत्र पछि पछुताउनु पर्ला नि !

चिनियाँ र नेपालीहरुको सयुक्त लगानीमा ठूलो तामझामका साथ खुलेको तथा निमार्ण जगतमा नाम चलेको होङसी सिमेन्ट अहिले गुणस्तरहिन भेटिएको छ । बजारमा निकै चलेको ब्राण्ड मानिने होङसी सिमेन्टलाई यतिबेला नेपाल गुणस्तर तथा नापतौल विभागले तोकिएको मापदण्डमा उत्पादन नभएको भन्दै स्पष्टीकरण सोधेको छ ।

यस्तै निमार्ण जगतमा चलेकै ब्राण्डमा पर्ने बृज सिमेन्ट र युनाइटेड सिमेन्ट पनि गुणस्तरहिन भएको भन्दै विभागले १५ दिने स्पष्टीकरण सोधेको हो ।

संसदको सार्वजनिक लेखा समितिमा सिमेन्टको गुणस्तरका बारेमा महानिर्देशक विश्वबाबु पुडासैनीमाथि घुस खाएको आरोप लागेपछि विभागले जबरजस्त एक्सन थालेको हो । अधिकांश उधोगहरुले विभागका प्राविधिक कर्मचारीहरुलाई ठूलो रकम घुस खुवाएर आफ्नो उत्पादनलाई नेपाल गुणस्तर चिन्ह प्रमाणित भन्दै सर्वसाधारणलाई ठगी गर्दै आएका छन् ।

विभागले तीन उद्योगको नमूना संकलन गरेर प्रयोगशालामा परीक्षण गराउँदा नेपाल गुणस्तर अनुरुप नपाएपछि स्पष्टीकरण सोधेको छ । विभागका अनुसार होङसीमा इनिसियल सेटिङ आधा घण्टामा हुनुपर्नेमा नरहेको पाइएको छ । विभागले यो उद्योगलाई नेपाल गुणस्तर प्रमाण चिन्ह नियमावली २०४० को नियम (१६) अनुसार १५ दिनको स्पष्टीकरण सोधिएको जनाएको छ ।

त्यस्तै बृज सिमेन्टको पीपीसी कम्प्रेसिभ स्ट्रेन्थ २१ एमपीए र आईआर (इन्स्लोबल रेसिड्यू) २९ दशमलब ९ प्रतिशत नेपाल गुणस्तर ३८५ अनुसार नभएको पाएको हो । पीपीसी सिमेन्टमा विभागले आईआर २८ प्रतिशत हुनुपर्ने मापदण्ड तोकेको छ । यसैगरि युनाइटेड सिमेन्टमा पनि आईआर २ दशमलब ६ प्रतिशत रहेको छ । गुणस्तर मापदण्ड अनुसार आईआर २ प्रतिशत हुनुपर्छ ।

यी तीनै उद्योगलाई पनि गुणस्तर नियमावली अनुसार १५ दिनको स्पष्टीकरण सोधिएको छ । अहिले तीनै उधोगद्धारा उत्पादित सिमेन्टलाई बजारमा बिक्री वितरण गर्न प्रतिबन्ध लगाइएको छ ।