नेकपा सचिवालय बैठक : प्रवक्ता श्रेष्ठ राष्ट्रियसभाको उम्मेदवार

१८ पुस काठमाडौं । नेपाल कम्युनिस्ट पार्टी ‘नेकपा’ले राष्ट्रियसभा चुनावका लागि उम्मेदवारको नाम टुगों लगाएको छ । शुक्रबार विहान बसेको पार्टीको सचिवालय बैठकबाट उम्मेदवारको नाम टुगों लगाएको पार्टीका प्रवक्ता नारायणकाजी श्रेष्ठले जानकारी दिए ।

आगामी माघ ९ गते हुने तय गरिएको राष्ट्रियसभाको रिक्त १८ सदस्य पदको निर्वाचनमा सत्तारुढ दल नेपाल कम्युनिष्ट पार्टीले आफ्ना उमेदवारको टुंगो लगाएको छ । सचिवाल बैठकले पूर्वएमालेका तर्फबाट ९ र पूर्वमाओवादीका तर्फबाट ७ जना उमेदवार खडा गर्ने निर्णय गरेको छ ।

जस अनुसार प्रदेश १ महिलामा इन्दु गौतम, दलितमा गोपी अछाम तथा अन्यमा देवेन्द्र दाहाललाई उम्मेदवार चयन गरिएको छ । यस्तै प्रदेश २ मा महिलामा तुलसा दाहाल र दलितमा राधेश्याम पासवान, प्रदेश ३ बाट महिलामा गंगा वेल्वासे तथा अन्यमा बेदुराम भुषाललाई चयन गरिएको छ ।

गण्डकी प्रदेशबाट अन्यमा नारायणकाजी श्रेष्ठ र महिलामा भगवती न्यौपाने तथा प्रदेश ५ मा महिलामा विमला घिमिरे, अपांगतामा जगप्रसाद शर्मा तथा अन्यबाटमा गोपाल भट्टराईलाई उम्मेदवार चयन गरिएको छ । यस्तै कर्णालीमा अन्यमा मायाप्रसाद शर्मा र महिलामा सुमित्रा विसिलाई छनौट गरिएको छ । सुदुरपश्चिममामा अन्यमा तारामान स्वार र महिलामा शारदा भट्टलाई उम्मेदवार बनाउने निर्णय नेकपाले गरेको छ ।

राष्ट्रियसभाका १८ रिक्त पदका लागि आगामी माघ ९ गते निर्वाचन हुँदैछ । निर्वाचनका लागि पुस २० गते मनोनयन दर्ता गर्ने कार्यतालिका रहेको छ ।