बम बिष्फोटका योजनाकार आदम राइन पक्राउ गर्ने सई धनुषाबाटै किन खेदिए ?

१८ पुष, जनकपुर । २२ दिन अघि धनुषाको महेन्द्रनगरमा भएको बम बिष्फोटका मुख्य योजनाकार मानिएका आदम राइन पक्राउ परेका छन् । सरकारद्धारा प्रतिबन्धित नेकपा विप्लव समुहका केन्द्रिय सदस्य रहेका राइनलाई जिल्ला प्रहरी कार्यालय धनुषाको क्राइम टोलीले गत पुष १६ गते यदुकुवा क्षेत्रबाट पक्राउ गरेको बताइएको छ ।

तर आश्र्चयको कुरा के छ भने सो बम काण्डका अभियुक्तलाई पक्राउ गर्न रातदिन नभनी खटिने कमाण्डर भने भोलिपल्टै धनुषाबाट खेदिएका छन् । विप्लव समुहको नेटर्वक ध्वस्त बनाउन मरिमेटने जिप्रका धनुषाका क्राइम टोली ईन्चार्ज सई सन्तोष झा भने प्रदेश प्रहरीको आदेशमा त्यहाँबाट लखेटिएका हुन् ।

मोष्ट वाण्टेडको सुचीमा रहेको व्यक्तिलाई पक्राउ गर्ने प्रहरीलाई पुरुस्कृत गर्नुपर्नेमा उल्टो प्रदेश डीआईजीले काज सरुवा गरेर कारवाही स्वरुप खेदेपछि यतिबेला धनुषाका प्रहरीहरु नै अचम्मित भएका छन् । हालसम्म पक्राउ बारे प्रहरीले सार्वजनिक जानकारी दिन नचाहानुले डीआईजी प्रद्युम्न कार्कीको विप्लव समुहका नेता आदम राइनसँग विशेष सम्बन्ध त थिएन भन्ने आशंका प्रहरीभित्रैबाट उब्जेको छ ।

गत मंसिर २७ गते धनुषाको क्षिरेश्वरनाथ नगरपालिकास्थित सखुवा महेन्द्रनगर बजारमा रहेको एक घरको मूलढोकामा टाइम बम झुण्ड्याइएको थियो । सो बम विष्फोटनमा परी प्रहरी निरीक्षक अमिरकुमार दाहालसहित ३ जनाको मृत्यु भएको थियो ।

बम विष्फोटमा परेर घरमुली राजेश साह र आनन्द साह र प्रहरी निरीक्षक दाहाल समेतको ज्यान गएको थियो भने २ जना घाइते भएका थिए । घटनापछि मुख्य योजनाकार मानिएका नेकपाका नेता आदम राइनसहित ९ जनालाई प्रहरीले मोस्ट वान्टेडको सूचीमा राखेको थियो ।

राइन पक्राउ परेको धनुषा प्रहरीले आधिकारिक जानकारी नदिए पनि स्रोत अनुसार अभियुक्त आदमलाई पक्राउ गर्न सफल भएको स्रोतको दाबी छ । प्राप्त जानकारी अनुसार आदमलाई प्रहरीले पुस १६ गते नै राति पक्राउ गरेको हो ।