बालुवाटारमा नेकपाको सचिवालय बैठक सुरु

२० पुस काठमाडौं । सत्तारूढ नेपाल कम्युनिस्ट पार्टी ‘नेकपा’को सचिवालय बैठक सुरु भएको छ । प्रधानमन्त्रीको सरकारी निवास बालुवाटारमा नेकपाको सचिवालय बैठक सुरु भएको हो । आजको बैठकमा केन्द्रीय कमिटीको बैठक सार्ने तयारी र सभामुख चयन प्रमुख एजेन्डाको रुपमा हेरिएको छ ।

आसन्न राष्ट्रियसभाको चुनावका लागि तयारी गर्नुपर्ने भएकाले केन्द्रीय कमिटीको बैठक सार्नुपर्ने देखिएकाले सोही विषयमा छलफल गर्न बैठक सुरु भएको समाचार स्रोतले जानकारी बताएको छ । गत पुस ६ गते सकिएको स्थायी कमिटी बैठकले पुस २३ गते केन्द्रीय कमिटीको बैठक बोलाउने निर्णय गरेको थियो ।

राजनीतिक प्रतिवेदन, विधान संशोधन प्रस्ताव, राष्ट्रिय अभियानको योजना र समसामयिक प्रस्तावलगायतका कार्यसूची तय गरेर केन्द्रीय सदस्यहरूलाई अन्तरपार्टी निर्देशनसमेत पठाइसकिएको थियो । यसअघि पार्टी एकताको दिन २०७५ जेठ ३ गते एकीकरणलाई औपचारिकता दिन र शपथ ग्रहणका निम्ति बालुवाटारमा केन्द्रीय कमिटी बैठक बसेको थियो ।

यता, रिक्त रहेको प्रतिनिधि सभाका सभामुख पदका विषयमा समेत पार्टी अनिर्णित रहँदा संसदीय गतिरोध कायमै छ । सो गतिरोध हटाउनका लागि सभामुख उम्मेदवार टुंगो लगाउने विषयमा पनि आजको बैठकलाई महत्वपूर्ण मानिएको छ ।