चीनियाँविरुद्ध धरौटी नमागी सोझै फैसला, जनहीँ एक हजार रुपैयाँ जरिवाना

२० पुस काठमाडौं । काठमाडौं जिल्ला प्रशासन कार्यालयले नेपालमा बसेर चीनमा अवैध क्रियाकलाप गरिरहेको आरोपमा पक्राउ परेका एक सय २२ चीनियाँ नागरिकलाई जनहीँ एक हजार रुपैयाँ जरिवाना फैसला गरेको छ।

अभद्र मुद्दामा हिरासतमा राखिएका ती चीनियाँविरुद्ध जिल्ला प्रशासन कार्यालयले धरौटी नमागी सोझै फैसला गरेको हो। यसले यी चीनियाँलाई चीन लैजाने बाटो सहज भएको छ। काठमाडौं प्रहरी परिसरका प्रवक्ता डीएसपी होबिन्द्र बोगटीले आइतबार नै उनीहरुलाई अध्यागमन विभागलाई बुझाउने तयारी भइरहेको बताए। ‘उनीहरुलाई अध्यामगन विभागमा उपस्थित गराउने तयारी भइरहेको छ। त्यसपछि उनिहरु अध्यागमन विभागको नियन्त्रणमा हुने छन्’, बोगटिले भने।

त्यसपछि उनीहरूलाई स्वदेश फर्काइने छ। चीनले आफ्ना नागरिकलाई आफ्नै देशमा लगेर कारबाही गर्ने जनाएपछि नेपाल प्रहरीले अभद्रमा मुद्धा चलाएर चीनियाँलाई स्वदेश फर्काउने बाटो सहज गरेको थियो। सामान्यतया कुनैपनि मुद्दामा सुरुमा थुनछेक आदेश भएर पछि मात्र फैसला हुने गर्दछ। तर जतिसक्दो आफ्ना नागरिकलाई स्वदेश लैजाने तयारी गरेको चिन सरकारलाई जिल्ला प्रशासन कार्यालयको पछिल्लो निर्णयले सहज भएको छ।

नेपाल बसेर आफ्ना नागरिकले चीनमा साईबरजन्य अपराध गरिरहेको निष्कर्श निकालेपछि चीन सरकारकै विषेश पहलमा एक साताअघि मनमैजु, बुढानिलकण्ठ र बाँसबारीमा चीनियाँ बसेका घरमा छापा मारेर नेपाल प्रहरीले एक सय २२ जना चीनियाँलाई पक्राउ गरेको थियो। तर यस अपराधका नाइकेहरु पक्राउ नपरेको भन्दै चीनियाँ पक्ष नेपाल प्रहरीको यस अप्रेसनमा सन्तुष्ट नरहेको बताइन्छ।