आज कांग्रेसले देशैभरिबाट सूचना विधेयक विरोधमा विरोधपत्र बुझाउँदै

५ माघ काठमाडौं । नेपाली कांग्रेसले आइतबार आज सूचना प्रविधि विधेयकको विरोधमा देशैभरिको जिल्ला प्रशासन कार्यालयमार्फत विरोधपत्र बुझाउने भएको छ । ७७ वटै जिल्ला प्रशासन कार्यालयमार्फत विधेयक सच्याउन माग गर्दै सरकारलाई विरोधपत्र बुझाइने कांग्रेसका प्रवक्ता विश्वप्रकाश शर्माले बताए ।

सूचना प्रविधिको सम्बन्धमा व्यवस्था गर्न बनेको विधेयकले नागरिकको विचार तथा अभिव्यक्ति स्वतन्त्रतालाई कुण्ठित गर्ने, विधेयकका कतिपय प्रावधान सविधानको मर्मको प्रतिकुल हुने र नागरिकको मौलिक अधिकार हनन हुने हुँदा विधेयक सच्याउनु पर्ने कांग्रेसले माग गर्दै आएको छ ।

गएको पुस १७ गते बसेको काङ्ग्रेस केन्द्रीय कार्यसमितिको बैठकले सूचना प्रविधि विधेयक तथा नेपाल विशेष सेवा गठन र सञ्चालनसम्बन्धी कानुलाई संशोधन र एकीकरण गर्न बनेको विधेयकले सविधानप्रदत्त नागरिक अधिकार हनन हुने निष्कर्ष निकालेको थियो ।