व्यास नगरपालिकामा कानूनी तथा मनोसामाजिक परामर्श

५ माघ दमौली । लागुऔषधको प्रयोग, रोकथाम र नियन्त्रणका लागि तनहुँको व्यास नगरपालिकामा कानूनी तथा मनोसामाजिक परामर्श केन्द्र स्थापना गरिएको छ । नेपाल प्रहरी र व्यास नगरपालिकाको सहकार्यमा व्यास नगरपालिकाको हाताभित्र परामर्श केन्द्र स्थापना गरिएको हो ।

केन्द्रको व्यास नगरपालिकाका प्रमुख बैकुण्ठ न्यौपाने र प्रहरी महानिरीक्षक सर्वेन्द्र खनालले शनिबार संयुुक्तरुपमा उद्घाटन गरे। नेपाल प्रहरीको सामुदायिक प्रहरी कार्यक्रमअन्तर्गत केन्द्र स्थापना गरिएको हो । बढ्दो लागुऔषधको प्रयोगलाई रोकथाम गर्न केन्द्रले काम गर्नेछ । लागुऔषध मुद्दामा पक्राउ परेकालाई यस केन्द्रमा निःशुल्क परामर्श दिई यसको नकारात्मक असरबारे अध्ययन गराइने जिल्ला प्रहरी कार्यालय तनहुँका प्रहरी उपरीक्षक विनोद सिलवालले जानकारी दिए ।

केन्द्रको सञ्चालन गर्न व्यास नगरपालिका र नेपाल प्रहरीबीच सम्झौता भएको छ । उक्त सम्झौतापत्रमा जिल्ला प्रहरी कार्यालय तनहुँका प्रहरी उपरीक्षक सिलवाल र व्यास नगरपालिकाका प्रमुख प्रशासकीय अधिकृत दिनेशराज पन्तले हस्ताक्षर गरेका छन् । सो अवसरमा व्यास नगरपालिकाका प्रमुख न्यौपानेले लागुऔषध विश्वका लागि चुनौतीपूर्ण बन्दै गएकाले यसलाई रोक्न समुदायस्तरमा नै सचेतना जगाउनु अहिलेको आवश्यकता रहेको बताए ।

प्रहरी महानिरीक्षक खनालले लागुऔषध प्रयोगकर्ता र ओसारपसार गर्नेको सङ्ख्या घटाउन समुदाय र विद्यालयस्तरबाटै अगाडि बढ्नुपर्नेमा जोड दिए । लागुऔषध ब्यूरोका प्रमुख वरिष्ठ प्रहरी उपरीक्षक वसन्त लामाले दुव्र्यसनीमा फसेका नयाँ जीवन दिन केन्द्रले विज्ञहरुको उपस्थितिमा परामर्श दिने बताए ।

केन्द्र सञ्चालनका लागि व्यास नगरपालिकाले दुई वटा कोठा र परामर्शदाताका लागि पारिश्रमिक उपलब्ध गराएको छ । आगामी दिनमा उक्त परामर्श केन्द्रबाट अन्य पीडामा परेका व्यक्तिलाई समेत परामर्श सेवा प्रदान गर्ने लक्ष्य राखिएको छ ।

पृथ्वीराजमार्गको ७२ किमि भाग ओगटेको तनहुँमा पनि प्रत्येक वर्ष लागुऔषध प्रयोगकर्ता वृद्धि हुँदै गइरहेको प्रहरी कार्यालयले जनाएको छ । आर्थिक वर्ष ०७३/७४ मा २७, ०७४/७५ मा ४० र ०७५/७६ मा ७० जना लागुऔषधसहित पक्राउ परेका छन् । जिल्लामा दर्ता हुने कूल मुद्दामध्ये लागुऔषधको मुद्दा दोस्रो स्थानमा रहेको प्रहरीले जनाएको छ ।

गृहमन्त्रालयको तथ्याङ्कअनुसार नेपालमा डेढ लाखदेखि दुई लाखसम्म लागुऔषध प्रयोगकर्ता रहेका छन् । नेपाल प्रहरीले तनहुँमा स्थापना गरेको केन्द्र तेस्रो हो । यसअघि वीरगञ्ज र चितवनमा परामर्श केन्द्र स्थापना भइसकेको छ ।

स्थानीय तहलाई सम्मान

शान्तिपूर्ण र सुरक्षित समाजको लक्ष्यसाथ प्रादुर्भाव भएको समुदाय–प्रहरी साझेदारी अवधारणाको कार्यान्वयनमा पु¥याएको योगदानस्वरुप प्रहरी प्रधान कार्यालयले जिल्लाका स्थानीय तहलाई सम्मान गरेको छ । समुदाय–प्रहरी साझेदारीका समिति निर्माण तथा समुदाय र विद्यालय केन्द्रित कार्यक्रमको कार्यान्वयनमा लिएको अग्रसरता उदाहरणीय रहेको जनाउँदै प्रहरीले स्थानीय तहलाई प्रशंसापत्रले सम्मान गरेको हो ।

प्रहरी महानिरीक्षक खनालले व्यास नगरपालिकाका प्रमुख न्यौपाने, भानु नगरपालिकाका प्रमुख उदयराज गौली, म्याग्दे गाउँपालिकाका अध्यक्ष मायादेवी राना, घिरिङ गाउँपालिकाका अध्यक्ष रनबहादुर राना, आँबुखैरेनी गाउँपालिकाका अध्यक्ष गिरबहादुर थापालाई प्रशंसापत्र प्रदान गरे ।