नेकपा सचिवालय बैठक ४ बजे, सभामुखबारे टुंगो लाग्ने

५ माघ काठमाडौं । लामो गलफत्ती र छिनाझम्टीपछि अन्ततः सत्तारुढ नेकपाले आज भने नयाँ सभामुखको नाम टुंग्याउने भएको छ । आइतवार बिहान प्रधानमन्त्री निवास बालुवाटारमा बसेका दुई अध्यक्ष केपी ओली र पुष्पकमल दाहाल ‘प्रचण्ड’बीच अब भने सभामुखको विवाद अन्त्य गर्ने सहमति भएको हो ।

यस प्रयोजनका लागि आजै साँझ ४ बजे पार्टी सचिवालय बैठक बोलाइएको छ । प्रधानमन्त्री निवास बालुवाटारमा बोलाइएको सचिवालय बैठकले सभामुखकाे नाम तय गर्ने भएको छ । आज बिहान पनि दुई अध्यक्षबीच कुरा भएका छन् , तर अझै साझा व्यक्तिमा भने सहमति जुटेको छैन ।

तर आज भने सचिवालय बैठकमा प्रचण्डले नै सभामुखको नाम प्रस्ताव गर्ने सहमति भने भएको बालुवाटार स्रोतले जनाएको छ । अध्यक्ष प्रचण्डले आज साँझ बस्ने सचिवालय बैठकमा सभामुखको नाम प्रस्ताव गर्ने छन् । स्रोत भन्छ– प्रचण्डले धोका दिएनन् भने आजको बैठकमा उनले सुभाषचन्द्र नेम्बाङकै नाम प्रस्ताव गर्ने छन् । आज बिहान पनि यसै आशयमा कुरा भएका छन्, पार्टी एकीकृत भइसक्यो भन्ने सन्देश दिन पनि प्रचण्डले नेम्बाङकै नाम प्रस्ताव गर्ने छन् । तर प्रचण्ड निकट स्रोत भने बालुवाटारले गरेको दावी हावादारी हो भन्छ ।

नेम्बाङको नाममा त अब कुनै हालतमा पनि सहमति जुट्नेवाला छैन, बरु प्रचण्ड कम्रेडले अग्नि सापकोटाको ठाउँमा पम्फा भूषालको नाम भने प्रस्ताव गर्न सक्नेछन् । प्रचण्ड निकट स्रोतको भनाई छ । तर जे भएपनि आज साँझ बस्ने सचिवालय बैठकले सभामुखका बारेमा एउटा निकास दिने छ । भोलि माघ ६ गते प्रतिनिधिसभाको बैठक डाकिएको छ ।