पूर्वी नवलपरासीबाट एक सय टन तरुल निर्यात

मिना कंडेल

५ माघ नवलपुर । पूर्वी नवलपरासी जिल्लाबाट यस बर्ष माघेसक्रान्तीमा एक सय टन भन्दा बढी तरुल निर्यात भएको छ ।नवलपुर जिल्लाबाट मात्रै यस बर्ष माघे संक्रान्तिमा काठमाडौं, पोखरा, नारायणगढ लगायतका क्षेत्रमा एक सय टनभन्दा बढी तरुल खपत भएको छ ।

नवलपुरको अरुणखोला, झ्यालबास, जुकेपानी, कावासोती, दलदले लगायतका क्षेत्रका व्यापारीहरुले एक सय टन भन्दा बढी तरुण नवलपुरबाट बाहिर पठाएको नवलपुरका तरुल व्यापारी लालबहादुर सारुले बताए । यस वर्ष तरुलको मूल्यमा गत बर्ष भन्दा कमी आएको सारुले बताए । अहिले नवलपुरमा स्थानीय बजारमा हात्तीपाइले तरुल ८० रुपैयाँ प्रति किलो, वन तरुल एक सय १ सय ४० रुपैयाँ प्रति किलो, चक्रे तरुल ८० रुपैयाँ प्रति किलो र ठूला तरुल अर्थात मुठे तरुल १ सय रुपैयाँ धार्नी विक्री भएको छ ।

पहिला पहिला नवलपुरमा उत्पादित तरुल काठमाडौं लगेर विक्री गर्नु पर्ने अवस्था रहे पनि गत बर्षबाट व्यापारीहरु कावासोतीमै आएर खरिद गरेर लाने गरेका छन् । यस बर्ष नवलपुरबाट एक करोड २० लाख भन्दा बढीको तरुल काठमाडौं र पोखराका व्यापारीले खरिद गरेर लगेको सारुले बताए । नवलपुरको देउराली, रुचाङ्ग, जौवारी, धौवादी, हुप्सेकोट, डेढडाउँ, बुलिंगटार लगायतका क्षेत्रमा सबैभन्दा बढी तरुल उत्पादन हुने क्षेत्र हो ।

त्यसैगरी नवलपुरको स्थानीय बजार कावासोती, अरुणखोला, दुम्किबास, प्रगतिनगर, गैडाकोट, रजहर, चोरमारा, डण्डा लगायतका बजारहरुमा पनि ४० देखि ५० टनको हाराहारीमा तरुल खपत भएको उनले बताए । नवलपुर क्षेत्रमा भने मोडे तरुल, वन तरुल, सकरखण्ड जस्ता तरुल सबैभन्दा बढी विक्री हुने गर्दछ ।