कृषि बैंकको एक वर्षमै बढ्यो निक्षेप १७ अर्ब

५ माघ काठमाडौं । कृषि विकास बैंकले १ वर्षमा १७ अर्ब रुपैयाँ निक्षेप बढेको छ । ५३औं वार्षिकोत्सवको पूर्वसन्ध्यामा आयोजित पत्रकार सम्मेलनमा जानकारी दिदै अघिल्लो वर्षको पुस मसान्तबाट यो वर्षको पुस मसान्तसम्मको तथ्यांक हेर्दा १७ अर्ब निक्षेप बढाएको देखिन्छ ।

गत वर्षको पुस मसान्तमा १ खर्ब १० अर्ब रुपैयाँ निक्षेप थियो भने यो वर्षको पुस मसान्तसम्म आइपुग्दा १ खर्ब २७ अर्ब रुपैयाँ निक्षेप रहेको छ । १ वर्षको बीचमा बैंकको निक्षेप १५.४४ प्रतिशतले बढेको उल्लेख गरिएको छ ।

तथ्यांकअनुसार बैंकको कर्जा तथा लगानी १०.२३ प्रतिशतले बढेको छ । १ वर्षको अवधीमा १ खर्ब ६ अर्ब रुपैयाँ कर्जा तथा लगानी रहेको बैंकको यो वर्षको पुस मसान्तमा आइपुग्दा १ खर्ब १७ अर्ब रुपैयाँ पुगेको छ ।

बैंकको खराब कर्जामा पनि धेरै घटेको देखिएको छ । गत वर्षको पुस मसान्तमा ४ अर्ब ७१ करोड रुपैयाँ खराब कर्जा थियो भने यो वर्षको पुस मसान्तमा ४ अर्ब २३ करोड रुपैयाँ पुगेको कृषि विकास बैंकका कार्यकारी अधिकृत अनिलकुमार उपाध्यायले जानकारी दिए । उनका अनुसार यो १ वर्षमा बैंकको खराब कर्जा १०।३१ प्रतिशतले घटेको छ ।

त्यस्तै रकमका आधारमा पनि खराब कर्जा निकै घटेको देखिन्छ । १ वर्षको बीचमा खराब कर्जा अनुपात ४.४२ प्रतिशतबाट ३.५९ प्रतिशतमा झरेको छ । सो आधारमा खराब कर्जा १८.६४ प्रतिशतले घटेको उनले बताए ।