प्रेस युनियनको नवौं केन्द्रीय महाधिवेशन चैत २१ र २२ गते नेपालगन्जमा हुने

७ माघ, चितवन । करिब छ बर्षको अन्तरालपछि नेपाल प्रेस युनियनको केन्द्रिय महाधिवेशन आगामी चैत्र २१ र २२ गते नेपालगन्जमा हुने भएको छ । युनियनको भरतपुरमा जारी केन्द्रीय कार्य समितिको बैठकले महाधिवेशनको मिति र स्थान तोकेको केन्द्रीय महिला उपाध्यक्ष बाला अधिकारीले जानकारी दिएकी छन् ।

पटक पटक घोषणा हुँदै रोकिदै आएको प्रजातन्त्रवादी पत्रकारहरुको छाता संगठन नेपाल प्रेस यूनियनको यो पछिल्लो घोषणाले पत्रकारहरुमा उत्साहको संचार गराएको छ ।

बैठकले माघ मसान्तभित्र बाँकी सबै जिल्ला शाखाहरुको अधिवेशन गरिसक्ने निर्णय गरेको छ । यूनियनका अझैं १० १२ शाखाहरुको नियमित अधिवेशन विविध कारणले रोकिदै आएको छ । उक्त बैठकले सरकारले अघि बढाएको सुचना प्रविधि बिधेयक, मिडिया काउन्सिल बिधेयक लगाएत आम नागरिकको अधिकार कुण्ठित हुने सबै बिधेयक विरुद्ध दबाबमूलक कार्यक्रम गर्ने निर्णय गरेको छ ।

हरेक तीन तीन बर्षमा हुनुपर्ने यूनियनको महाधिवेशन यसपटक भने करिब ६ बर्षपछि हुन लागेको हो । २०७१ भदौमा पोखरामा सम्पन्न आठौं महाधिवेशनले बद्री सिग्देलको अध्यक्षतामा ७१ सदस्यीय केन्द्रिय समिति निर्वाचित गरेको थियो ।

नेपाल प्रेस युनियन नेपालका प्रजातन्त्रवादी पत्रकारहरुको साझा संगठन हो । स्थापनाकालदेखि नै यसले पत्रकारहरुको हकहितमा आवाज उठाउँदै आएको छ । २०४८ सालमा स्थापना भएको यो संगठन यतिखेर व्यवसायिक तथा पेशागत रुपमा स्थापित हुँदै आएको छ । यसको उत्पत्ती नै ट्रेड युनियनवादको अवधारणा अनुरुप भएको हो ।

ट्रेड युनियन संसारका सम्पूर्ण श्रमजीवीहरुको संरक्षणको केन्द्र हो । ट्रेड युनियन कुनै औद्योगिक प्रतिष्ठानमा काम गर्ने मजदुरहरु मात्र नभई सबै खाले काम गरेर जीविकोपार्जन गर्ने शिक्षक, कर्मचारी, किसान, पत्रकारहरुको हकहित संरक्षण ट्रेड युनियनवादभित्र अन्तरनिहीत छ । नेपालका सञ्चारकर्मीहरुलाई संगठित बनाई श्रमजीवीका पक्षमा वकालत गर्दै आएको नेपाल प्रेस युनियन अन्तर्राष्ट्रिय पत्रकार महासंघको नेपालबाट सदस्यता प्राप्त गर्ने पहिलो संस्था हो ।

२०४८ साल जेठ १३ गतेका दिन प्रजातान्त्रिक पत्रकारहरुको भेलाले पेशागत प्रत्याभूति र एकताबद्ध तथा संगठित रुपमा अगाडि बढ्ने दृढधारणा प्रतिबद्धता गर्दै नेपाल प्रेस युनियनको स्थापना भएको हो । श्रमजीवी पत्रकारहरुको हकहित संरक्षण पनि ट्रेड युनियन आन्दोलनले नै गर्न सक्छ भन्ने हेतुले २०४८ साल जेठ १३ गते तत्कालीन प्रधानमन्त्री स्व.गिरिजाप्रसाद कोइरालाका प्रेस सल्लाहकार जयप्रकाशप्रसाद गुप्ताको संयोजकत्वमा ९ सदस्यीय तदर्थ समिति गठन गरी नेपाल प्रेस युनियनको जन्म भएको हो ।

युनियनको स्थापनाकालमा जम्मा १७ जना सदस्यहरु रहेका थिए । जसमा जयप्रकाश प्रसाद गुप्ता, हरि अधिकारी, रमेश तुफान, राजेश ढुंगाना, श्रीश बल्लभ प्रधान, शोभाकर पराजुली,जगदीश घिमिरे, कन्हैयालाल केशरी, राजेश्वर नेपाली, हरिहरप्रसाद श्रेष्ठ, गणेशप्रसाद नेपाल, तारानाथ दाहाल, कृष्ण कँडेल, योगेश उपाध्याय,यादव थपलिया, रामचन्द्र उप्रेती र गणेशबल्लभ प्रधान रहेका थिए ।

उक्त तदर्थ समितिले २०४८ साल फागुन १५, १६ गते ललितपुरमा प्रथम महाधिवेशन सम्पन्न गरी युनियनको विधान २०४८ सहित हरि अधिकारीको नेतृत्वमा नयाँ कार्यसमिति चयन गरेको थियो । सो कार्यसमितिको महासचिवमा रमेश तुफान, कोषाध्यक्षमा उज्वल झा, सदस्यहरुमा तारा बराल, कन्हैयालाल केशरी, राजेश्वर नेपाली, शिरिष बल्लभ,जगदीश भट्टराई, बबिता बस्नेत, अच्युत वाग्ले, राजनराज तिमिल्सिना लगायत रहेका थिए ।