आजदेखि उखु किसानको आन्दोलन फेरि सुरु

८ माघ सर्लाही । सरकारले आफूहरुसँग गरेको सहमति कार्यान्वयन नगरेको भन्दै उखु किसानहरुले बुधबार आजबाट फेरि आन्दोलन गर्ने भएका छन्।

सरकार र उखु किसान संघर्ष समितिबीच गएको पुस १८ गते माघ ७ गतेभित्र सबै किसानको उखु बिक्री बापतको रकम भुक्तानी गर्ने सहमति भएको थियो । नेपाल उखु उत्पादक महासंघका अध्यक्ष कपिलमुनि मैनालीले किसानसँग सरकारले गरेको पूर्व सहमति कार्यान्वयन नभएकाले सडक आन्दोलन गर्न लागेको जानकारी दिए।

उखु किसानले उद्योगबाट पाउनु पर्ने १ अर्ब २० करोडमध्ये अहिलेसम्म जम्मा १५ करोड मात्र भुक्तानी पाएका छन्। सर्लाहीको बागदहमा रहेको महालक्ष्मी सुगर मिलले १० करोड, अन्नपुर्ण सुगर मिल धनकौलले ३५ करोड , श्रीराम सुगर मिल रौतहटले ४२ करोड र नवलपरासीको ईन्दिरा सुगर मिलले ९ करोड रुपैयाँ भुक्तानी गर्न बाँकी रहेको छ ।

सोमबारसम्म महालक्ष्मी सुगर मिल बगदहले ११ करोड ५० लाख, अन्नपूर्ण सुगर मिल धनकौलले ३ करोड ९० लाख र इन्दिरा सुगर मिल नवलपरासीले ७४ लाख रुपैयाँ रकम भुक्तानी गरेका छन् । सरकारले दिनु पर्ने १अर्ब ३४ करोड रुपैयाँ अनुदान रकम अहिलेसम्म उखु किसानले पाउन सकेका छैनन् ।