अझै पाएनन् उखु किसानले भुक्तानी

भूपराज बस्याल

८ माघ, काठमाडौं । माघको पहिलो हप्तासम्म उखु किसानको रकम भुक्तानी गर्ने गरी सरकारले उखु किसानसँग गरेको सम्झौता कार्यनयन भने हुन सकेको छैन ।

सरकारले सम्झौता अनुरुपमा भुक्तानी नगरेको भन्दै उखु किसानले माघ ११ गते सर्लाहीमा भेला गर्ने भएका छन् । सर्लाहीको हरियोनमा बिहान ११ बजे भेला गर्न लागिएको उखु उत्पादक सर्लाही जिल्ला संघका सदस्य गोविन्द मैनालीले जानकारी दिए । देशभरका उखु किसान समेट्नेगरि आयोजना गर्न लागिएको भेला उखु उत्पादक महासंघ, उखु मिल्गेट समिति र नेकपाको भातृ संगठनका अखिल नेपाल उखु महासंघले गर्दैछन् ।

मैनालीका अनुसार सरकारले ७४/७५ को तीस करोड र ७५/७६ को एक अर्ब अनुदान नदिएको भन्दै व्यावसायी बाट पीडित बनेका किसानलाई सरकारले समेत अनुदान नदिएको गुनासो गरे । आन्दोलन स्थगित गर्ने बेलामा सरकारले गठन गरेको समितिमा किसान रहने बताइएको भएपनि हाल सम्म उक्त समितीमा सरकार र व्यावसायी मात्रै रहेको हुँदा किसानको पक्षमा भन्दा पनि व्यावसायीको हितमा सरकार लागेको उनको गुनासो छ । “ हामीलाई समितिमा राख्ने भनियो तर अहिलेसम्म समितीमा किसान प्रतिनिधित्व हुन सकेको छैन । “ उनको गुनासो थियो ।

सरकाले तोकेको उखुको मूल्य प्रति क्विन्टल ५ सय ३६ रुपियाँ ५८ पैसा भएको र त्यसमा चिनी मिलले ४ सय ७१ रुपियाँ २८ पैसा दिने र बाँकी सरकारले अनुदानमार्फत ६५ रुपियाँ २८ पैसा दिने भने पनि सरकारले समेत अनुदान रकम रोकेको हुँदा बैकल्पिक उपायबारे छलफल गर्न भेलाको आयोजना गरिएको मैनालीले जानकारी दिए ।

मैनालीका अनुसार विरेन्द्र कनोडियाले संचालन गरेको महालक्ष्मी चिनी मिल सर्लाहीले २१ करोड दिनुपर्नेमा जम्मा १२ करोड दिएको, राकेश अग्रवालले संचालन गरेको अन्नपूर्ण चिनी मिल सर्लाहीले ४० करोड दिनुपर्नेमा जम्मा ५ करोड दिएको, हितेश गोल्छा र विशाल अग्रवालले संचालन गरेको श्रीराम चिनी मिलले ४० करोड दिनुपर्नेमा एक रुपैयाँ पनि नदिएको र राकेश अग्रवालले संचालन गरेको इन्दिरा चिनी मिलले १० करोड दिनुपर्नेमा एक रुपैयाँ पनि नदिएको बताए । उनका अनुसार देशभर रहेका १४ चिनी मध्य अन्नपूर्ण चिनी मिल, श्रीराम चिनी मिल र इन्दिरा चिनी मिल गरि तीन मिल बन्द अवस्था रहेका छन् ।