सरकारले प्रजातान्त्रिक अधिकारहरु साँगुरो बनाउँदै लग्यो

११ माघ, काठमाडौं । नेपाली कांग्रेसका नेता प्रकाशमान सिंहले सरकारले प्रजातान्त्रिक अधिकारहरु साँगुरो बनाउँदै लगेको आरोप लगाएका छन् ।

शनिबार प्रेस युनियन काठमाडौं शाखाले बालाजुको बाइसधारामा आयोजना गरेको ‘वृहत् वनभोज’ कार्यक्रमलाई सम्बोधन गर्दै नेता सिंहले वर्तमान सरकारले प्रेसमाथि अंकुश लगाउने प्रयास गरिरहेको आरोप लगाएका हुन् ।

कार्यक्रममा बोल्दै नेता सिंहले नागरिकको बोल्न पाउने अधिकारमा समेत नियन्त्रण गर्ने तयारी वर्तमान सरकाले अगाडि बढाउँदै लगेको बताएका छन् । पत्रकारलाई चनाखो भएर नागरिकको अभिब्यक्ति स्वतन्त्रताको रक्षाको लागि लाग्न आग्रह गर्दै उनले लोकतन्त्रका मूल्य मान्यतामाथि नै प्रहार गरेर बिस्तारै कम्युनिष्ट अधिनायकवादतर्फ सरकार उन्मुख रहेको बताए ।

कार्यक्रममा कांग्रेसका महामन्त्री डा. शशाङ्क कोइराला, नेपाल प्रेस युनियनका केन्द्रिय अध्यक्ष बद्री सिग्देल, पत्रकार महासंघका उपाध्यक्ष विपुल पोख्ररेल, वरिष्ठ पत्रकार तथा नेपाल बहसका प्रधानसम्पादक इन्द्र रिजाल लगायत प्रेस युनियन काठमाडौं शाखाका कार्यसमिति पदाधिकारीका साथै प्रेस युनियनमा आबद्ध पत्रकारहरुको सहभागिता रहेको थियो ।