दर्जन अधिकारकर्मी पक्राउ

१३ माघ काठमाडौं । चरम विवादको घेरामा तानिएका नवनियुक्त सभामुख अग्निप्रसाद सापकोटा पद तथा गोपनीयताको शपथ लिन आज बिहान राष्ट्रपति भवन शितलनिवास पुग्दा अर्काे झडप भएको छ । शपथग्रहण कार्यक्रमको विरोधमा त्यहाँ पहिल्यै अधिकारकर्मी पुगिसकेका थिए ।

सापकोटालाई शपथ नगराउन दवाव दिने उद्येश्यले शितलनिवास अगाडि भेला भएका एकदर्जन भन्दा बढी अधिकारकर्मीलाई प्रहरीले पक्राउ गरेको छ । अधिकारकर्मी चरण प्रसाईं लगायत एक दर्जन पक्राउ परेको महानगरीय प्रहरी प्रभाग प्रमुख एसएसपी उत्तमराज सुवेदीले पुष्टि गरे ।

सार्वजनिक स्थानमा होहल्ला भएकाले केही अधिकारकर्मीलाई नियन्त्रणमा लिइएको उनले बताएका छन् । उता, होहल्लाकै बीच सापकोटाले भने राष्ट्रपति विद्यादेवी भण्डारीका अघिल्तिर सभामुख पदको शपथग्रहण गरेका छन् ।