भागबण्डामै आउने भो नेविसंघ तदर्थ समिति

१३ माघ काठमाडौं । भागबण्डामा कुरा मिलेपछि आज सुरु नेपाली कांग्रेस केन्द्रीय कार्य समिति बैठकले नेपाल विद्यार्थी संघको तदर्थ समिति घोषणाको तयारी गरेको छ ।

सभापति शेरबहादुर देउवा निकट स्रोतका अनुसार, आजै नेवि संघको तदर्थ समितिको घोषणा हुने छ । राजीव ढुँगाना अध्यक्ष रहने उक्त तदर्थ समितिमा अहिले केही उपाध्यक्ष र महामन्त्रीसहित पदाधिकारी रहने छन् ।

१२७ सदस्यीय तदर्थ समिति बनाउने सन्दर्भमा गत शुक्रबार नै देउवा निवास बुढानिलकण्ठमा वरिष्ठ नेता रामचन्द्र पौडेल र अर्का नेता कृष्णप्रसाद सिटौलाबीच सहमति जुटिसकेको छ ।

जसमा संस्थापन पक्षबाट अध्यक्ष सहित दुई उपाध्यक्ष , तीन महामन्त्री , दुई सहमहामन्त्री र कोषाध्यक्ष रहने छन् । यस्तै यस्तै पौडेल पक्षबाट दुई जना उपाध्यक्ष , तीन जना महामन्त्री र दुई जना सहमहामन्त्री रहने सहमति जुटेको छ ।

यसैगरी पूर्व महामन्त्री सिटौला पक्षबाट पनि दुई जना उपाध्यक्ष , दुई जना महामन्त्री र दुई जना सहमहामन्त्री रहने छन् । साथै , विजय गच्छदार पक्षबाट समेत केही पदाधिकारी समेटिने जानकारी दिइएको छ ।