नेकपा केन्द्रीय कमिटी बैठक सुरु

१५ माघ काठमाडौं । सत्ताधारी नेपाल कम्युनिष्ट पार्टीको वहु-प्रतिक्षित केन्द्रीय कमिटी बैठक भर्खरै राजधानीको राष्ट्रियसभामा सुरु भएको छ ।

तत्कालिन नेकपा एमाले र माओवादी केन्द्र एकीकरणपछि बनेको नेकपामा हाल ४४५ केन्द्रीय सदस्य रहेका छन् । बैठकको औपचारिक उद्घाटन गरेका प्रधानमन्त्री समेत रहेका के पी ओलीले नेकपाले नै देशमा समृद्धि ल्याउने दावी गरे ।

सरकारी नियन्त्रणमा रहेको नेपाल टेलिभिजन लगायत केही एफ एम रेडियोले प्रत्यक्ष प्रशारण गरिरहेको उद्घाटन समारोहमा प्रधानमन्त्री ओलीले देशलाई नयाँ दिशा दिन नेकपा सक्षम रहेको दावी गरेका छन् ।

साथै उनले आफू सत्तामा आएपछि भएका सुधार र उपलव्धिबारे केन्द्रीय सदस्यहरुलाई फेहरिस्त सुनाएका छन् । विगतमा कम्युनिष्ट पार्टीको यस्तो बैठक अत्यन्तै गोप्य रुपमा हुने गरेकोमा यसपाला भने ओलीले प्रत्यक्ष प्रशारण गराउनुका पछाडि सम्भावित आलोचनाबाट बच्न हो भनी अनुमान गरिएको छ ।

ओलीको संवोधन लगत्तै अर्का अध्यक्ष पुष्पकमल दाहालले राजनीतिक प्रतिवेदन प्रस्तुत गर्ने कार्यक्रम रहेको बताइएको छ ।उक्त प्रतिवेदनमाथि भोलिबाट समूहगत रुपमा छलफल गर्ने कार्यक्रम रहेको छ । वैठक यही माघ २२ गतेसम्म सञ्चालन हुने बताइएको छ ।